Boston Dynamics’ning robot-iti 74,5 ming dollardan sotuvga chiqdi

Amerikaning Boston Dynamics kompaniyasi tomonidan ishlab chiqariluvchi Spot roboti sotuvga chiqdi. Bu haqda kompaniya sayti orqali xabar berildi.

Ishlab chiqaruvchining ma’lum qilishicha, robot-it mobil robotlar sohasiga qiziquvchi dasturchilarga mo‘ljallangan. Xususan, sanoat nazorati va ko‘ngilxushlik yo‘nalishiga.

Spot robotining narxi 74,5 ming dollarni tashkil etmoqda. Robotni faqatgina AQSh hududida xarid qilish mumkin, boshqa davlatlardagi mijozlarga robot ijaraga beriladi xolos. Boston Dynamics roboti buyurtma qilinganidan 6-8 hafta o‘tib yetkazib beriladi.

Kompaniyaning ta’kidlashicha, Spot “qutidan chiqishi bilan” ishga tayyor bo‘ladi, robotning moslashuvchan interfeysi uni turli dasturlarga to‘g‘irlash imkonini beradi. YouTube’dagi Boston Dynamics kanaliga Spot’ning imkoniyatlari reklama qilingan rolik joylashtirilgan.

To‘rt oyoqli robotga berilgan izohga ko‘ra, u zinalar bo‘ylab chiqishi, belgilangan hududni kesib o‘tishi va bino ichida kichikroq o‘lchamga ega bo‘la olishi mumkinligi yozilgan. Shuningdek, Spot xavfli yoki murakkab hududlardagi obyektlarni ko‘zdan kechirishi, saytdan ma’lumotlarni avtomatlashtirilgan holda yig‘ishi, hali tadqiq etilmagan hududlarga yuklarni tashishi mumkin.

Avvalroq Boston Dynamics roboti cho‘ponlik ham qila olishi mumkinligi to‘g‘risida xabar berilgandi.