АҚШда ҳайдовчисиз бошқариладиган электротрактор яратилди (видео)
Monarch Tractor компанияси Калифорнияда Смарт технологияси ёрдамида ишлайдиган дунёдаги биринчи тўлиқ электротракторни тақдим этди. Бу ҳақда компания матбуот хизмати хабар берди.
Электротрактор ҳайдовчисиз ҳаракатланиши, ҳосил ҳақидаги маълумотларни таҳлил қилиши ва смартфон орқали бошқарилиши мумкин. Трактор қуввати 40 от кучига (30 кВт) тенг, қисқа муддатли энг юқори қуввати 70 от кучига (55 кВт) етиши мумкин.
Трактордан йўлтанламас сифатида, дала майдонларида эса электрогенератор ўрнида фойдаланиш мумкин. Трактор эгаси смартфон орқали амалга оширилган ишлар ва келгусидаги метеорологик шароитлар тўғрисида маълумотларни олиб туради.
Monarch Tractor дала майдонининг ҳолати бўйича маълумотларни тўплаб, таҳлил қилади ва ҳосилни, унинг ўсиши ҳамда ўсимликлар соғлиғини баҳолайди.
Тракторнинг бошланғич нархи 50 минг долларни ташкил этади. Савдолар 2021 йилнинг кузидан бошланиши кутилмоқда.
