Дайжестимиз хабарлари худди ўтиб бораётган ҳафта ҳавоси сингари ҳар хилдир. Илиқ янгиликлар ҳам, совуғи ҳам бор. Энг сўнгги хабар – ЕОИИга кузатувчи бўлишимиз эса айримлар учун илиқ бўлса, бошқалар учун СССРнинг совуқ шабадаси бўлиб туюлмоқда.
Яхши хабардан бошлаймиз. Конституция қабул қилинганининг 28 йиллиги муносабати билан жазо ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 104 нафар фуқаро афв этилди. Афв этилган шахсларнинг олти нафари асосий жазодан тўлиқ озод этилди, 50 нафари жазони ўташдан муддатидан илгари шартли равишда озод қилинди, яна 17 кишининг озодликдан маҳрум этиш жазоси енгилроқ жазо билан алмаштирилди. Шунингдек, 41 шахсга тайинланган озодликдан маҳрум этиш жазосининг муддатлари қисқартирилди. Натижада жами 63 киши жазони ўташ муассасаларидан озод этилди.
Яна бир яхши хабар: Ўзбекистон АҚШнинг диний эркинлик бўйича «Махсус кузатувдаги давлатлар рўйхати»дан (Special Watch List) чиқарилди. Ўзбекистон ушбу рўйхатга 2019 йилда киритилганди.
* * *
Ўтган йилнинг май ва октябрь ойларида Яқин Шарқдаги можаролар ҳудудидан ўзбекистонликлар қайтарилган эди. 8 декабрь куни «Меҳр» операциясининг давоми амалга оширилди. «Меҳр-3» операцияси мобайнида Суриянинг жанговар ҳаракатлари олиб борилаётган ҳудудларидан 98 ўзбекистонлик, яъни 25 аёл ва 73 бола ватанга қайтарилди. Уларнинг шахсини тасдиқловчи ҳужжатларни расмийлаштириш бўйича ҳам тегишли ишлар амалга оширилиши айтилди.
Хўш, эркаклар-чи? Яқин Шарқда қийин аҳволга тушган эркаклар қайтариладими, йўқми? Бу саволга Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари Музаффар Комилов: «ушбу операция давомида биринчи навбатда энг муҳтож бўлган болалар ва аёллар олиб келиняпти. Эркаклар масаласида ўрганиш керак бўлган жиҳатлар бор. Агарки, қўли қон бўлмаса, кимнингдир қотили бўлмаса, вақти келиб, Ватанга, албатта, қайтади», деб жавоб берди.
* * *
Кунларнинг совиб кетишига доимий ҳамроҳ бўладиган газ танқислиги одамларни кўчага чиқишга ундамоқда. Тўсатдан газ узилишига кўникмаган аҳоли автомобиль йўлларини тўсиб маҳаллий ҳукумат эътиборини тортишга ҳаракат қилмоқда. Аслида бутун республикада газ таъминоти кўнгилдагидек бўлмаса-да, алифбо тартибида Андижон вилоятидаги норозиликдан бошлаймиз.
10 декабрь куни кечқурун Андижон шаҳрининг «Ҳамдўстлик» маҳалла фуқаролар йиғини аҳолиси шаҳарнинг Ўзбекистон кўчаси ва Бобур шоҳкўчаси кесишмасидаги йўлнинг қатнов қисмини тўсишга ҳаракат қилди. Сезганингиздек, 1,5 мингдан зиёд хонадонда газ пастлаб кетгани бунинг бош сабаби бўлди.
Шундай ҳолат Бухорода ҳам кузатилди. Тарқаган видеоларда кўринишича, 20 нафарча аёл Бухоронинг катта кўчаларидан бирини тўсиб норозилик билдирмоқда. Аниқланишича, 949 та хонадонда 5 610 киши истиқомат қилаётган «Работипоён» маҳалла фуқаролар йиғинида айни пайтда табиий газ босими пасайган. Масъуллар буни, ҳар доимгидек, об-ҳаво совуб кетиши билан изоҳлаган. Бу воқеа Бухоро туманида бўлган.
Ўша куни Бухоронинг Қоракўл туманида ҳам аҳоли автомобиль йўлини тўсиб қўйди. Тумандаги «Дўстлик» ва «Қоракўз» МФЙларида газ муаммоси аҳолини кўчага чиқишга мажбур қилган. «Дарё» мухбири ҳолатни ўрганиш учун Бухорода бўлди.
Мавзуга доир:
Ноябрь ойида Россия Фарғонадан помидор ва қалампир олиб киришга тақиқ қўйганини ёзган эдик. Ҳафта бошида эса Россия ветеринария ва фитосанитария назорати бўйича федерал хизмати қуритилган ўрикда хавфли зараркунанда аниқлангани сабабли Фарғона вилоятидан барча ўсимлик маҳсулотларини олиб киришга тақиқ жорий этди. Хавфли зараркунанда бу капр қўнғизидир. Кўп ўтмай худди шу ташкилот Қашқадарёдан помидор ва қалампир олиб киришга тақиқ қўйди. Ўзбек маҳсулотларида жигарранг буришиш вируси аниқланганмиш.
Бу тақиқлар нимадан далолат беради? Ҳақиқатан ҳам миллий маҳсулотларимизда айб борми ёки сиёсий босим воситасими? Бу ҳақда аниқ фикр йўқ, аммо «Юксалиш» умуммиллий ҳаракати раиси, қуйи палата депутати Бобур Бекмуродов бу ҳол республика экспорт салоҳиятига таъсир кўрсатишини эътиборга олиб, Жаҳон савдо ташкилотига аъзоликни тезлаштириш кераклигини эслатди.
13 декабрь куни журналистлар билан учрашувда Фарғона вилояти ҳокими Хайрулло Бозоров Россия қайтарган помидор қаерда етиштирилганини айтди.
«Биз барчасини аниқладик — помидор Марғилон бозоридан олиб борилган. Охири ўша помидорни сотган тадбиркорни ҳам қидириб топдик ва маҳсулот қаерда етиштирилганини ҳам аниқладик. Биз у ерга ҳам бордик ва иссиқхонани текширувдан ўтказдик. Эътиборли томони, унда ҳам касаллик аниқланмади. Бу маълумотларни ‘Роспотребнадзор’ карантин инспекциясига юбордик», деди Бозоров.
* * *
Бундан олдинги хабаримизни навбатдаги хабар изоҳлаши мумкин. Ўзбекистон Евросиё иқтисодий иттифоқида расман кузатувчи-давлат мақомини олди. 11 декабрь куни Евросиё иқтисодий иттифоқининг (ЕОИИ) видеоанжуман шаклида ўтган саммитида бу эълон қилинди. Ўзбекистон билан бирга Куба ҳам ЕОИИда кузатувчи мақомини олди. Видеотадбирда ЕОИИга аъзо давлатлар — Россия, Беларусь, Қозоғистон, Қирғизистон, Арманистон, шунингдек, кузатувчи мақомидаги Молдова ва таклиф этилган мамлакат сифатида Куба етакчилари иштирок этди.
Март ойининг бошларида эса Ўзбекистон ЕОИИга кузатувчи-давлат мақомида қўшилиши маълум бўлганди. Май ойида Олий Мажлис Ўзбекистоннинг ЕОИИ фаолиятида кузатувчи давлат мақомида иштирок этиши тўғрисидаги таклифни маъқуллаганди. Овоз бериш жараёнида 100 сенатордан 91 нафари иштирок этди. Улардан 71 нафари қарорни маъқуллаб овоз берди, 16 сенатор қарши чиқди, тўрт сенатор бетараф қолди.
Энг муҳим ва муҳокамали хабарларни «Дарё»да ўқиб боринг. Оммавий эмлаш бошлангунча карантин қоидаларига риоя қилинг.
Изоҳ (0)