Ижтимоий тармоқларда Бухоро вилояти аҳолиси автомобиль йўлини тўсиб қўйиб, газ йўқлигидан норозилик билдираётган тасвирланган видео тарқалди. Видеолавҳа муаллифи таъкидлашича, одамлар газ йўқлиги сабаб нозорилик билдиришмоқда. Шу куннинг ўзида интернетда Бухоро вилояти Қоракўл туманида олинган видео ҳам пайдо бўлди. Bukhara News маълумотларига кўра, «Дўстлик» ва «Қоракўз» маҳаллалари аҳолиси электр энергияси ва газ таъминотидаги муаммолар сабаб М37 трассасини тўсиб қўйган, деб хабар беради «Gazeta.uz».
Фото: Bukhara News
Ижтимоий тармоқларда Қоракўл туманининг «Дўстлик» ва «Қоракўз» маҳалла фуқаролар йиғинида яшовчи фуқароларнинг газ таъминоти тизимидаги муаммолардан ўз норозилигини билдириб, Қоракўл туманидан ўтувчи М37 халқаро трассани тўсишга уринаётгани тасвирланган видеолавҳалар тарқалди.
Бухоро тумани
«Ҳудудгаз Бухоро» компанаиясининг маълум қилишича, газ таъминоти филиали ходимлари муаммони ўрганган, газ таъминоти билан боғлиқ юзага келган масалаларни бартараф қилиш учун барча зарур чоралар кўрилган.
«Ҳудудгаз Бухоро» Қоракўл туманидаги «Когон» магистрал газ қувурлари бошқармасига қарашли «Қоракўл» газ тақсимлаш станциясидан тумандаги истеъмолчиларга 6 атмосфера босими остида етказиб берилаётган табиий газни газ тақсимлаш станциясидаги 2-рақамли жўмрак орқали 1,8—2 атмосферага қисқартирилиши натижасида аҳоли хонадонларига табиий газ таъминоти тўхтаб қолганини тан олган. Бу эса тумандаги «Дўстлик» ва «Қоракўз» маҳалла фуқаролар йиғини аҳолисининг норозилигига сабаб бўлган.
«Натижада 1,3 мингдан ортиқ уй хўжаликлари газ таъминотида муаммоларга дуч келган. Айни вақтда ҳудудда газ таъминоти тикланган», — дейилади хабарда.
Бухоро тумани ҳокимлиги ўрганишлар жараёнида видеоматериал тумандаги «Работипоён» маҳалла фуқаролар йиғинида тасвирга олинганини маълум қилган. Аниқланишича, 949 та хонадонда 5 минг 610 киши истиқомат қилаётган «Работипоён» маҳалла фуқаролар йиғинида айни пайтда табиий газ босими пасайган.
Шунингдек, ҳокимлик дастлабки ўрганишлар жараёнида маҳалладаги газ маромлаш пунктининг соз ҳолатда эканлигини билдирган. Ҳозирда газ босими билан боғлиқ муаммони бартараф этиш чоралари кўрилмоқда.
Қоракўл тумани
Қоракўл тумани ҳокимлиги матбуот хизматининг маълум қилишича, 762 та истеъмолчи рўйхатдан ўтказилган «Дўстлик» маҳалласи аҳолиси газ таъминоти сабаб тартибсизлик уюштирган.
«Об-ҳавонинг кескин совуши натижасида газга бўлган талаб ошиб кетиб, қувурлардаги босимнинг пасайиши содир бўлди. Шунингдек, газ тақсимотига аҳоли томонидан ўзбошимчалик билан газ қувурларига ўрнатилган қўлбола қурилмалар сабаб бўлган», — дейилади хабарда.
Ҳокимликнинг маълум қилишича, шу куннинг ўзида авария бригадалари барча газ таъминотлари тармоқларида мониторинг ўтказиб, табиий газ босимини нормаллаштирган.
Ҳозирда «газ тармоқларига ўрнатилган ностандарт қурилмалар»ни бартараф этиш ва газ тақдимотини тартибга солиш бўйича ишлар амалга оширилмоқда.
Эслатиб ўтамиз, ўтган йили Андижон, Фарғона, Сирдарё вилоятлари ҳамда Қорақалпоғистонда газ ва электр энергияси йўқлиги сабаб аҳоли йўлларни ёпиб қўйишганди ва шу орқали ўз муаммоларига ҳокимият вакилларини эътиборини тортишга уринишган эди.
