Тасвирлардан кўриш мумкинки, норозилик иштирокчилари 20 нафар атрофида, уларнинг кўпчилиги — аёллардан иборат. Улар билан ЙҲХБ ходимлари суҳбатлашмоқда. Одамлар 60 га яқин хонадон газсиз қолганини таъкидлаяпти.
«Халқ сўзи Online» нашрининг ёзишича, ўрганишлар жараёнида видеоматериал Бухоро туманидаги «Работипоён» маҳалла фуқаролар йиғинида тасвирга олинганлиги маълум бўлган. Аниқланишича, 949 та хонадонда 5 минг 610 нафар киши истиқомат қилаётган «Работипоён» маҳалла фуқаролар йиғинида айни пайтда табиий газ босими пасайган. Мутахассислар буни об-ҳавонинг кескин тушиб кетиши натижасида газ истеъмоли кўпайиши ва оқибатда ҳудуд аҳолисининг аксарият хонадонларида табиий газ босимида муаммолар пайдо бўлганлиги билан изоҳлаган.
Вазият бўйича Бухоро вилояти ҳокимияти изоҳ берган. «Ҳолат вилоят ҳокимлиги, секторлар раҳбарлари ва соҳа мутасаддилари томонидан ўрганилмоқда. Ўрганиш якунлари бўйича батафсил ахборот берилади», — дейилади ҳокимият хабарида.
Эслатиб ўтамиз, ўтган йили Андижон, Фарғона, Сирдарё вилоятлари ҳамда Қорақалпоғистонда газ ва электр энергияси йўқлиги сабаб аҳоли йўлларни ёпиб қўйишганди ва шу орқали ўз муаммоларига ҳокимият вакилларини эътиборини тортишга уринишган эди.
Изоҳ (0)