9 декабрга ўтар кечаси тахминан соат 01:00 атрофида Андижон шаҳри Қўшариқ даҳасидаги 24-А уйнинг 48-хонадонида ёнғин рўй берди, деб хабар қилади «Kun.uz». Маълум бўлишича, хонага табиий газ тўпланиб қолган ва уй эгаси чироқни ёққач, чақнаш рўй бериб, ёнғин келиб чиққан.
Ёнғин хабари Андижон вилояти фавқулодда вазиятлар бошқармаси навбатчилик қисмига келиб тушгач, ёнғин хавфсизлиги ходимлари ҳодиса жойига дарҳол етиб борган ва соат 01:16 да ёнғин бартараф этилган.
Маълум қилинишича, уй эгаси газ тўпланган хонада чироқни ёқиб юбориши натижасида чақнаш ҳодисаси рўй бериб, ёнғин содир бўлган. Ёнғин оқибатида 48-хонадонда яшовчи уч нафар фуқаро турли даражада тан жароҳати олиб, шифохонага ётқизилган. Андижон шаҳар фавқулодда вазиятлар бўлими бошлиғи ўринбосари, майор Муҳаммадамин Усмоновнинг сўзларига кўра, айни пайтда ҳолат юзасидан терговга қадар текширув ишлари олиб борилмоқда.
Андижон шаҳри ҳокими ўринбосари, Маҳалла ва оилани қўллаб-қувватлаш бўлими бошлиғи Моҳинур Қосимова ёнғин оқибатида зарар кўрганлар вилоят ҳокими томонидан тўлиқ бошқа жойга кўчирилиб, уйларини таъмирлаш учун 5 та қурилиш бригадаси иш бошлаганини билдирган.
Қайд этилишича, бир ҳафта муддат ичида мазкур хонадонлар тўлиқ таъмирдан чиқарилиб, хонадон эгалари қайта кўчиб киради.
«Мутахассислар билан келиб ўрганганимизда хонадоннинг ичидан газ сўрғич чиқди. Тармоқда босимнинг пасайиб кетиши оқибатида фуқаро газ сўрғичдан фойдаланган. Газ сўрғични резина шланг орқали қўйган. Резина шлангдан газ сизиб чиқиши оқибатида хонадонга ис гази тўлиб, электрни ёққанда чақнаш содир бўлган.
Ҳозир магистрал қувурларида газ босими озгина пасайиши кузатиляпти. Биз биринчи навбатда шаҳар ҳудудидаги кўп қаватли уйларни газ билан таъминлашга эътибор қаратяпмиз. Кеча кечки пайт меъёрлаштириш ишларини олиб бориб, бу ерда газ таъминотини бир меъёрга келтирганмиз.
Лекин бу газга ҳам қаноат қилмасдан фуқаролар томонидан газ сўрғич қўйиб олиш ҳолатлари кузатиляпти. Кўчада газ тўлдириш шохобчаларини ҳам белгиланган соатда ўчириб, бундан тежаб қолинаётган газ ҳажмини асосан шаҳардаги кўп қаватли уйларга қаратяпмиз», — дейди Андижон шаҳаргаз бўлими бошлиғи Хуршидбек Қодиров.
Аввалроқ Қибрайдаги хонадонда газ портлаши оқибатида уй эгаси ва унинг ўғли ҳалок бўлгани, шунингдек, Янгийўлдаги хонадонда газ портлаши оқибатида икки киши ҳалок бўлгани, уйнинг бир қисми қулаб тушгани тўғрисида хабар берилганди.
Изоҳ (0)