АҚШ Молия вазирлиги иқтисодиётни кучайтиришга 916 млрд доллар ажратишни таклиф қилди

АҚШ Молия вазирлиги Конгрессга COVID-19 пандемияси шароитида иқтисодиётни кучайтиришга қаратилган тезкор чоралар учун 916 миллиард доллар ажратишни таклиф қилди. Бу ҳақда мамлакат молия вазири Стивен Мнучин Twitter’да маълум қилди, деб ёзади «РБК».

«Мен президент номидан 916 миллиард долларлик таклифни тақдим этдим, бу 908 миллиардлик икки партияли таклифдан анча йирикроқ пакет ҳисобланади», — деди у.

Декабрь бошида Сенат аъзолари гуруҳи 908 миллиард долларлик иқтисодиётни ривожлантириш чоралари пакети вариантини тақдим этган эди. Таклифни ҳам Демократлар, ҳам Республикачилар партиясидан сенаторлар тақдим этди.

Мнучиннинг таъкидлашича, ривожлантириш доирасида маблағларнинг бир қисмини Молия вазирлиги ажратади, шу жумладан, 140 миллиард долларни иш ҳақини қўллаб-қувватлаш дастурининг фойдаланилмаган маблағларидан, 429 миллиард долларни эса Молия вазирлиги жамғармаларидан олиш режалаштирилмоқда.

Демократлар томонидан назорат қилинувчи Вакиллар палатаси ҳамда кўпчилик ўринни республикачилар эгаллаган Сенат кучайтириш чоралари пакетининг ҳажми борасида баҳслашишда давом этмоқда. Демократлар фикрича, қўллаб-қувватлаш қиймати 2 триллион доллардан ошиши керак, Республикачилар эса 1 миллиард доллардан кўп бўлмаслигини талаб қилмоқда.

Аввалроқ Америка маъмурияти Конгресснинг розилиги билан коронавирус шароитида иқтисодиётни қўллаб-қувватлаш учун 3 триллиондан ортиқ маблағ ажратган эди. Пандемия сабабли молиявий ёрдамнинг биринчи пакетини АҚШ президенти Дональд Трамп март охирида имзолаган эди. Ўшанда иқтисодиётни кучайтиришга 2 триллион доллардан ортиқ маблағ йўналтирилган эди.

Ушбу молиялаштириш пакети мамлакат тарихидаги энг йириги бўлди. Маблағ соғлиқни сақлаш тизимини қўшимча молиялаштиришга, бизнесни қўллаб-қувватлашга, америкаликларга тўғридан-тўғри тўловларга, шунингдек, ишсизлик нафақасини вақтинчалик оширишга йўналтирилди.