Украинада 2021 йил 8 январдан коронавирус тарқалишига қарши курашиш учун қатъий чеклов чоралари кучга киради. Бу ҳақда Украина бош вазири Денис Шмыгаль ҳукумат мажлисида маълум қилди, деб ёзмоқда. Meduza.
«Вазият мураккаб, бироқ биз баъзи ижобий тенденцияларни кўряпмиз, 2020 йилнинг охиригача уч ҳафта қолди ва ҳукумат бу даврда қатъий карантин жорий этмасликка қарор қилди», — деди бош вазир.
Карантин 24 январга қадар жорий этилади ҳамда кинотеатрлар, спорт заллари, савдо марказлари, ноозиқ-овқат маҳсулотлари дўконлари ишига чеклов қўйишни кўзда тутади, шунингдек, кафе ва ресторанлар фақат етказиб бериш хизмати учун ишлайди.
Барча ўқув муассасалари таътилга чиқади, карантин вақтида ҳар қандай кўнгилочар, реклама, спорт, маданий, оммавий тадбирлар тақиқланади.
Озиқ-овқат дўконлари, дорихоналар, банклар ва меҳмонхоналар ўз ишини давом эттиради. Бундан ташқари, жамоат транспорти ҳаракати тўхтатилмайди.
2020 йилнинг ноябрь ойи ўртасидан Украинада дам олиш кунлари карантин амал қилганди ва шу кунларда умумий овқатланиш муассасалари, савдо марказлари ва кўнгилочар муассасалар иши тақиқланганди. Декабрь ойининг бошида Украина ҳукумати мазкур карантинни узайтирмасликка қарор қилган, мамлакат Соғлиқни сақлаш вазирлиги эса қатъийроқ чекловларни жорий этишни тавсия қилган.
Расмий маълумотларга кўра, ҳозирги пайтга қадар Украинада коронавирус билан касалланиш бўйича қарийб 868 мингта ҳолат қайд этилган, касаллик оқибатида 14,7 минг киши ҳалок бўлган. Сўнгги бир сутка ичида мамлакатда 12,9 мингта янги ҳолат аниқланган.
Изоҳ (0)