Россия Давлат думаси депутатлари мамлакатнинг собиқ президентларининг дахлсизлигини кафолатловчи қонунни учинчи ўқишда қабул қилди. Бу ҳақда Meduza хабар берди.
Қонунга кўра, собиқ президентнинг жиноий ёки маъмурий жавобгарликка тортилмаслиги, уни ҳибсда ушлаб туриш, сўроқ қилиш, тинтув ўтказиш каби чораларни қўлламаслик кафолатланади.
Қабул қилинган ҳужжатга кўра, «Ўз лавозимини тарк этган Россия Федерацияси президенти ва унинг оиласи кафолатлари тўғрисида»ги федерал қонуннинг учинчи бандига ўзгартириш киритилди. Ушбу ўзгариш собиқ президентнинг жиноий ёки маъмурий жавобгарликка тортилмаслигини, уни ҳибсда ушлаб туриш, сўроқ қилиш, тинтув ўтказиш каби чораларни қўлламасликни кафолатлайди. Шунингдек, бу тартиб унинг барча мол-мулки, ҳужжатлари, юки ва ёзишмаларига ҳам амал қилади.
Қонуннинг олдинги таҳририга кўра, собиқ президентни фақат ўз ваколатини эгаллаб турган муддати давомидаги фаолияти учун жиноий жавобгарликка тортиш мумкин эмас эди.
Қонунга кўра, собиқ президент Дума томонидан давлатга хиёнатда айблансагина, ундан дахлсизлик ҳуқуқи олиб ташланиши мумкин.
Собиқ президентларнинг дахлсизлигини кафолатлаш тўғрисидаги қонун лойиҳаси 5 ноябрь куни Давлат думасига тақдим этилган эди. Давлат думаси ҳужжатни биринчи кўриб чиқишдаёқ, 17 ноябрь куни қабул қилди.
Meduza’нинг ёзишича, янги қабул қилинган қонун федерал қонунчиликни Россия конституциясининг янги таҳририга мослаштиради.
«Қонун собиқ президентларга истеъфога чиққанида кўплаб жиноятлар ва маъмурий ҳуқуқбузарликларни содир этишга рухсат беради. Бундан ташқари, қонун собиқ президентни дахлсизлик ҳуқуқидан маҳрум этиш жараёнини қийинлаштиради», — дейилади хабарда.
Изоҳ (0)