Аргентина терма жамоасини ЖЧ—2014 финалига олиб чиққан мураббий вафот этди

Аргентина терма жамоаси собиқ бош мураббийи Алехандро Сабелья 66 ёшида вафот этди. Бу ҳақда Clarin хабар қилмоқда.

Унинг қўл остида Аргентина терма жамоаси ЖЧ—2014 финалига қадар етиб бориб, 1990 йилдан кейинги энг яхши натижани қайд этганди.

Мутахассис юракдаги муаммо туфайли вафот этган. Сабельянинг ҳолати оғирлашувига эса инфекцияли касалликка қарши қабул қилинган антибиотиклар сабаб бўлгани айтилмоқда.

Сабелья мураббийлик фаолияти давомида «Эстудиантес» клубини ҳам бошқарган. Ла-Плата шаҳри клубини 2009—2011 йилларда бошқарган мутахассис кейинчалик 2011—2014 йилларда мамлакат бош жамоасига устозлик қилганди.

Футболчилик даврида эса «Лидс», «Шеффилд», «Эстудиантес» ва «Ривер Плейт» каби жамоаларда тўп тепган.

Эслатиб ўтамиз, 25 ноябрь куни Аргентина терма жамоасининг яна бир таниқли мураббийи ва афсонавий ўйинчи Диего Марадона юракдаги муаммолар сабаб ҳаётдан кўз юмганди.