Argentina terma jamoasi sobiq bosh murabbiyi Alexandro Sabelya 66 yoshida vafot etdi. Bu haqda Clarin xabar qilmoqda.
Uning qo‘l ostida Argentina terma jamoasi JCh—2014 finaliga qadar yetib borib, 1990-yildan keyingi eng yaxshi natijani qayd etgandi.
Mutaxassis yurakdagi muammo tufayli vafot etgan. Sabelyaning holati og‘irlashuviga esa infeksiyali kasallikka qarshi qabul qilingan antibiotiklar sabab bo‘lgani aytilmoqda.
Sabelya murabbiylik faoliyati davomida “Estudiantes” klubini ham boshqargan. La-Plata shahri klubini 2009—2011-yillarda boshqargan mutaxassis keyinchalik 2011—2014-yillarda mamlakat bosh jamoasiga ustozlik qilgandi.
Futbolchilik davrida esa “Lids”, “Sheffild”, “Estudiantes” va “River Pleyt” kabi jamoalarda to‘p tepgan.
Eslatib o‘tamiz, 25-noyabr kuni Argentina terma jamoasining yana bir taniqli murabbiyi va afsonaviy o‘yinchi Diyego Maradona yurakdagi muammolar sabab hayotdan ko‘z yumgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)