Депутат Алишер Қодиров аҳолининг коммунал тўловлар бўйича қарздорлигини камайтириш йўлини таклиф қилди
Ойлик даромади 1 миллион сўм бўлган одамга газ ва электрдан 10 миллион сўмлик қарздорликни юклаб қўйиш масаланинг ечими эмас. Бу ҳақда Олий Мажлис Қонунчилик палатаси спикери Алишер Қодиров фикр билдирди.
Депутатнинг қайд этишича, аҳолининг коммунал хизматлардан қарздорлиги даражаси ортиб бораётгани уни қаттиқ ташвишга солмоқда. Таъкидланишича, биргина газ таъминотидан қарздорлик 6,5 триллион сўмга етган, коммунал хизматлардан умумий қарздорлик 11 триллион сўм атрофида.
Тармоқларни таъмирлаш долзарб масала экани, энергия ресурсларини ишлаб чиқарувчи компаниялар таннархни қоплашда қийинчиликларга дуч келаётганини яхши биламиз. Шу сабабли ҳам партиямиз («Миллий тикланиш» — «Дарё» изоҳи) сайловлар пайтида тўловларни аҳолининг даромадидан келиб чиққан ҳолда табақалаштиришни таклиф қилган эди.Аввалроқ «Ҳудудий электр тармоқлари» компанияси Ўзбекистонда аҳолининг электр энергиясидан умумий қарздорлиги 2,4 триллион сўмга етганини маълум қилган эди. Қарздорлар орасида уч йилдан бери тўлов қилмаётган 283 мингдан ортиқ истеъмолчи борлиги таъкидланган эди.Биздаги маълумотларга кўра ҳозир иш билан банд аҳолининг 70 фоизи 2 миллион сўмдан кам иш ҳақи оляпти. Биз буни доимий бўлишини тарафдори эмасмиз, лекин бугунги шароитдан келиб чиқиб, даромади кам бўлган аҳолига коммунал тўловларни табақалаштириш орқали қарздорликни кўпайиб кетишининг олдини олиш мумкин.
Бугунги кунда ойлик даромади 1 миллион сўм бўлиб турган одамга газ ва светдан 10 миллион сўмлик қарздорликни юклаб қўйиш ва унинг уйига МИБни жўнатиш масаланинг ечими эмас. Буни тизимли ҳолатда ечишимиз зарур, деб ҳисоблаймиз.
Алишер Қодиров, Олий Мажлис Қонунчилик палатаси спикери ўринбосари
Маълумотларга кўра, Тошкент шаҳрининг электрдан қарздорлиги 161 миллиард сўм бўлиб, шундан 51 миллиарди аҳолининг қарзи. Бундан ташқари, Тошкентда аҳолининг сувдан қарздорлиги 124 миллиард сўмга етгани, қарздорлар орасида ўзига тўқ фуқаролар борлиги маълум қилинган эди.
