Ўзбекистон Адлия вазирлиги томонидан 2020 йил 4 декабрь куни Ўзбекистон волонтёрлари ассоциацияси давлат рўйхатидан ўтказилди, деб хабар беради Telegram’даги «Ҳуқуқий ахборот» канали.
Ассоциациянинг асосий мақсади волонтёрлик фаолиятини ташкил этишга қаратилган фуқаролик ташаббусларини ривожлантириш, инсонпарварлик, бағрикенглик ҳамда ҳамжиҳатлиликни қўллаб-қувватлаш, волонтёрларнинг ҳуқуқ ва манфаатларини ҳимоя қилишдан иборат.
Таъкидланишича, бугунги кунда 80 дан ортиқ мамлакатда йирик профессионал волонтёрлик ташкилотлари мавжуд. Кўнгиллилар сектори жамият ижтимоий-иқтисодий ривожланишининг муҳим таркибий бўлагини ташкил этади.
Мамлакатда ҳам волонтёрлик фаолиятини янада қўллаб-қувватлаш мақсадида «Волонтёрлик фаолияти тўғрисида»ги қонун қабул қилинган.
Унга кўра, волонтёрлик орқали кам таъминланганларга, кўп болали оилаларга, бошпанасизларга ёрдам кўрсатиш, беморларни, ногиронлиги бўлган шахсларни, қарияларни парваришлаш, спорт, маданий ва бошқа тадбирларни ташкил этишга кўмаклашиш ҳамда бошқа усулларда хайрия ишларини амалга ошириш мумкин.
Қонун давлат органларига волонтёрлар (волонтёр гуруҳлар, волонтёр ташкилотлар) билан ижтимоий шериклик тўғрисида шартномалар тузиш орқали уларни қўллаб-қувватлаш имконини беради.
Эслатиб ўтамиз, ноябрь ўрталарида Тошкент шаҳри ҳокимининг ёшлар билан учрашувда волонтёрлар ҳақида гапирган гаплари ижтимоий тармоқларда муҳокамага сабаб бўлганди. Хусусан, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ўз саҳифасида шаҳар ҳокимининг фикрларига эътироз билдириб, «Тошкент шаҳрини ҳокимият эплолмай қолганида айнан шу волонтёрлар ҳаётини хавф остига қўйиб, одамлар дардига малҳам бўлгани» ҳақида ёзди. Шундан сўнг Тошкент шаҳар ҳокимлиги ахборот хизмати юқорида баҳсга сабаб бўлган видеолавҳанинг тўлиқ версиясини эълон қилди.
Изоҳ (0)