Қозоғистоннинг собиқ президенти Нурсултон Назарбоевнинг куёви ва «Газпром» компаниясининг директорлар кенгаши аъзоси Тимур Кулибаев Марказий Осиёдан Хитойга газ қувури қурилиши билан боғлиқ шартномалар бўйича камида бир неча ўн миллион доллар фойда олган. Бу ҳақда Financial Times нашрига таяниб, Spot хабар берди.
Нашр 2008—2014 йилларда бошланган ва Кулибаевнинг қурилиш шартномаларидан даромад олиш йўлларини батафсил баён этган ёзишмаларни ўрганиб чиқди. Financial Times’га исми ошкор этилмаган маълумот берувчидан мактублар келиб тушган. «Уларда кўплаб ҳужжатлар мавжуд, уларнинг маълумотлари корпоратив маълумотлар билан тасдиқланган», — деб хабар беради нашр. Financial Times ҳужжатларнинг бир қисмини ўзининг веб-сайтида эълон қилган.
Газ қувури учун қувурларни етказиб бериш бўйича шартномалар Александр Кармановнинг Евросиё қувур консорциуми билан тузилган. Схема бўйича, консорциум қувурларни Россия ва Украинадаги фабрикалардан сотиб олган, лекин дастлаб консорциум қувурларни ишлаб чиқариш учун ўша заводларга пўлат сотган. Бунда консорциумнинг ўзи ушбу пўлатни сотиб олинган нархга катта устама қўйган ҳолда сотган.
Financial Times ўрганган шартномаларга кўра, Евросиё қувур консорциуми Хитойнинг Jiangsu Shagang компаниясидан пўлатнинг тоннасини 935 доллардан сотиб олиб, Россиянинг Қувур металлургия компаниясига 1,5 минг долларга сотган.
Қувур металлургия компанияси билан тузилган шартномада унинг харажатлари умумий қиймати 200 миллион долларни ташкил этган, яъни Евросиё қувур консорциуми учун фойда 75 миллион долларни ташкил этган, аммо Financial Times томонидан ўрганилган ҳужжатлар бу пулнинг катта қисми Евросиё қувур консорциуми учун эмас, балки Кулибаев учун мўлжалланганлигини кўрсатмоқда.
Ҳужжатларга кўра, пўлатдан келган устама даромад Қозоғистон биринчи президентининг куёви томонидан Сингапур ва БААда рўйхатдан ўтган компаниялар орқали олинган. Тахминларга кўра, Кулибаев фойданинг 70 фоизини, яъни 53 миллион долларни битта операциядан олиши керак бўлган.
Financial Times томонидан ўрганилган хатлардан бирига кўра, ушбу жараённи назорат қилиш учун Кулибаевнинг ишчилари унинг одами Евросиё қувур консорциумида улуш олишини таклиф қилган, бу эса унга компания қарорлари устидан назорат қилиш имкониятини берарди.
2012 йил октябрь ойида Евросиё қувур консорциуми ходими Кулибаев вакилларига Карманов ушбу таклифга рози бўлганлигини ёзган. Хатларга кўра, Кулибаевнинг Евросиё қувур консорциуми акциядорлигига номзоди қозоғистонлик тадбиркор Мурат Балапанов эди. Корпоратив маълумотларига кўра, Балапанов 2012 йил декабрь ойида Евросиё қувур консорциумида 0,000001 фоиз улушни олган ва компания президенти бўлган.
Financial Times томонидан кўриб чиқилган электрон почта хабарлари шуни кўрсатадики, 2008—2012 йилларда Кармановнинг компаниялари газ қувури учун пўлат қувурларни ишлаб чиқариш бўйича камида 370 миллион долларлик, Қозоғистон нефть ва гази билан савдо қилиш бўйича 1,5 миллиард долларлик шартномаларни ютиб олган.
Кулибаевнинг адвокатлари Financial Times’га уларнинг мижози ҳеч қачон Евросиё қувур консорциумида тўғридан-тўғри ёки билвосита улушга эга бўлмаганлигини айтган. Улар Балапанов Кулибаевнинг манфаатларини ҳимоя қилганлиги ҳақидаги маълумотни ҳамда унинг Евросиё қувур консорциуми акцияларига эгалик қилганлигини рад этмоқда. Улар Кулибаев Евросиё қувур консорциуми устамасидан даромад олаётгани ҳақидаги маълумотни ёлғон деб атаган ва уларнинг мижози дезинформация кампаниясининг объекти бўлганлигини таъкидлаган.
Тимур Кулибаев Қозоғистоннинг энг бой ишбилармонлари рўйхатида иккинчи ўринни эгаллаб турибди, унинг бойлиги Forbes томонидан 2,9 миллиард долларга баҳоланган, у Нурсултон Назарбоевнинг қизи Динара билан турмуш қурган. 2008 йилда Кулибаев бюджети 80 миллиард долларни ташкил қиладиган Қозоғистоннинг Миллий фаровонлик жамғармаси раис ўринбосари, 2011 йилда эса жамғарма раиси бўлган.
Изоҳ (0)