Баҳрайн Pfizer ва BioNTech компаниялари томонидан яратилган коронавирусга қарши вакцинадан фавқулодда фойдаланишга рухсат берган дунёдаги иккинчи давлатга айланди, деб хабар беради «Интерфакс».
«Pfizer/BioNTech вакцинасининг маъқулланиши подшоҳлик томонидан пандемия даврида мамлакатдаги барча аҳолининг соғлиғини сақлаш бўйича қабул қилинган коронавирусга қарши кураш чораларига муҳим қўшимча ҳисобланади», — дейди Баҳрайн Соғлиқни сақлаш миллий хизмати раҳбари Марям ал-Жалаҳма.
Pfizer компанияснинг Форс кўрфазидаги бўлинмаси раҳбари Линдси Диeтчи Баҳрайннинг ушбу қарорини «COVID-19’га қарши курашдаги тарихий ҳодиса» деб атаган.
Баҳрайнда пандемия бошланганидан буён 87 мингдан ортиқ одам коронавирусга чалинган бўлиб, уларнинг 85 мингдан ортиғи соғайган, беморларнинг 341 нафари вафот этган.
Эслатиб ўтамиз, 2 декабрь куни Буюк Британия дунёда биринчи бўлиб Pfizer’нинг коронавирусга қарши вакцинасидан фойдаланишни маъқуллаган. Шунингдек, Pfizer ва BioNTech вакцинани АҚШда ҳамда Евроиттифоқда рўйхатдан ўтказиш учун ариза берган.
Мавзуга доир: Pfizer йил охирига қадар режадагидан икки баробар камроқ — 50 млн доза вакцина ишлаб чиқаради
Изоҳ (0)