Warner Bros кинокомпанияси 2021 йилда барча фильмларни бир вақтнинг ўзида кинотеатрлар ҳамда HBO Max онлайн хизматида намойиш этади, деб хабар беради Meduza.
Кинокомпания йил давомида 17 та фильм чиқаришни режалаштирган. Улар орасида «Уюм», «Матрица-4», «Ўз жонига қасд қилиш гуруҳи: Миссия зарбаси», «Годзилла Конгга қарши», «Том ва Жерри», «Мўъжиза аёл» каби фильмлар ўрин олган. Шунингдек, кинокомпания нега бундай қарорга келганига ҳам ойдинлик киритиб ўтди, унга кўра, йил охирига қадар томошабинларнинг кинотеатрларга тўлиқ қайтиши кутилмаяпти.
Маълум бўлишича, АҚШнинг HBO Max обуначилари Warner Bros премьераларини ортиқча тўловларсиз томоша қилиши мумкин. Россияда эса ушбу хизмат расман мавжуд эмас.
Warner Bros премьераларни бир вақтнинг ўзида кинотеатр ҳамда онлайн намойиш этиши, албатта, вақтинчалик бўлиб, бу 2021 йил охирига қадар режалаштирилган. Одатда янги фильмлар кинотеатрлардаги премьерадан 2-3 ой вақт ўтгачгина бу каби платформаларда пайдо бўларди. Бундан ташқари, коронавирус пандемияси туфайли 2020 йил кинотеатрларда намойиши мўлжалланган йирик премьераларнинг аксарияти бир неча ойга қолдирилган.
Изоҳ (0)