Фото: Ҳинд киноси юлдузлари ва уларнинг ота-оналари

Дунёга келган чақалоқнинг келажакда ким бўлиши ва машҳурликка эришишини тасаввур қилиш қийин. Истеъдод ёки қобилият қанчалик мужассам бўлмасин, у ёки бу одамнинг муваффақиятга эришишига ота-онанинг хизмати ва таъсири беқиёс бўлади. Қуйида ҳинд киносида ўз ўрнига эга бўлган машҳурларнинг дунёга келишига сабабчи бўлган инсонлар ким экани ҳақида маълумот бериб ўтамиз.

Айшвария Рай

Дунё гўзали Айшвариянинг ота-онаси кино санъатидан йироқ инсонлар. Отаси Кришнарай Рай савдо-флоти офицери. Онаси эса ўзини фарзандларига бағишлаган ва бўш вақтида китоб ёзиб турган. Отаси ҳарбий бўлгани сабаб улар Мангалорда донғи чиққан оилалардан бўлган. Бу эса фарзандларга яхши таълим бериш ва ўқитиш имконини берган. Болалигидан классик мусиқа ва рақс билан шуғулланган Айшвария, Бомбейга кўчиб келганидан кейин нуфузли Аря Видя Мандир коллежида хорижий тилларни ўрганган. Шунга қарамай, карьерасини моделлик ва актрисаликда давом эттиришга қарор қилган.

Дипика Падуконе

Данияда дунёга келган Дипиканинг оиласи у туғилганидан кейин Ҳиндистонга қайтиб келган. Актрисанинг онаси Ужалла тур-агент, отаси Пракаш эса бадминтон бўйича профессионал спортчи бўлган. У 1980 йил Англиядаги очиқ чемпионатда ғолиб деб топилган ва бу ҳинд спортчилари томонидан қайд қилинган илк натижа эди. Бундан ташқари 1981—1983 йилларда бронза ва олтин медалларни қўлга киритган.

Анушка Шарма

Анушканинг отаси Ажай Кумар ҳам ҳарбий бўлган, онаси эса Айшварияники сингари фарзандлар тарбияси билан шуғулланган. Анушканинг акаси Карнеш ҳам савдо флотида хизмат қилади.

Приянка Чопра

Приянканинг ота-онаси Ашок ва Мадху Чопралар ҳарбий шифокор бўлган. Уларнинг хизмат юзасидан шаҳарма-шаҳар юриши эса қизининг ўқув муассасаси тез-тез ўзгариши ва ўрта мактабни АҚШда тугатишига сабаб бўлган. Приянка оилада ёлғиз фарзанд эмас, унинг кичик укаси бор. Отаси 2013 йилда саратондан вафот этган.

Бипаша Басу

Бипаша Нью-Делида дунёга келган. Унинг Бидиша ва Биджоэта исмли опалари бор. Отаси Хирак Басу муҳандис бўлиб ишлаган. Онаси Мамта эса уй бекаси бўлган ва қизлар тарбияси билан шуғулланган.