Ушбу машҳур ва маҳоратли актрисаларни танимаган, улар иштирок этган фильмларни мириқиб томоша қилмаган инсон топилмаса керак. Ўтган асрнинг юлдузлари ҳисобланган актрисалар машҳурликка эришгандан сўнг ҳаёти қай тариқа кечгани эса мухлислар учун, албатта, қизиқ.
Ҳема Малини
Ҳема Малини ўз фаолиятини актрисаликдан бошламаган. У дастлаб муваффақиятга эришган раққоса эди. Шунингдек, унинг жанубий ҳиндча талаффузи ҳам кинога оламига киришга унчалик йўл бермаган. Ва ниҳоят Раж Капур билан суратга олинадиган фильмда лўли-раққоса қиз керак бўлган ва буни Ҳема Малини аъло даражада уддалаган. Кейинчалик унга бир неча лўли образлари учун таклифлар ҳам тушган. Актриса доимо аёлларни илғор фикрлашга ундайдиган образларни гавдалантиришга ҳаракат қилган. Айнан «Зита ва Гита»да ҳам зўравонликка қарши туриш масаласи кўтарилган. «Қасос ва қонун» фильмидаги Басанти ролидан сўнг Ҳиндистондаги юзлаб аёллар пул топишга қарор қилган.
Ҳема Малини актёр Дхармендра билан суратга олиш майдончасида танишган. Албатта, Ҳема Малини дастлаб бунга эътибор бермаган. Ниҳоят Дхармендра унга нияти жиддий эканлиги ва карьерасини тўхтатмаслигини ишонтиришга муваффақ бўлган. Шундан сўнг юлдузли жуфтлик оила қурган. Ўтган кўп йиллар давомида актриса турмуш ўртоғига нисбатан кўпроқ фильмларда суратга тушган. Сўнгги йилларда Малинига хос одатий ролларидан бири «Ота» бўлиб, Ҳиндистоннинг ёш бева аёллари ҳолатини намоён қилган. У картинада бева аёлнинг қайнонасини ижро этган. Шунингдек, у ўзининг учта фильмини ҳам суратга олган.
Зинат Аман
«Абадий муҳаббат эртаги» ва «Али бобо ва қирқ қароқчи саргузаштлари» фильмидан сўнг машҳурликка эришган Зинатнинг оиласини одатий деб аташ қийин, у Германияда мусулмон ва ҳинд оиласида дунёга келган. Болалигиданоқ оиласи ажралиб, Зинат онаси билан бирга Мумбайга қайтган. Бироздан сўнг онаси бошқа кишига турмушга чиққан ҳамда у Зинатга жуда меҳрибон ота бўлган. Кейинчалик ўрта мактабни тугатган Зинат АҚШга журналистикадан сабоқ олишга кетади. Актрисанинг биринчи турмуш ўртоғи оилали актёр бўлиб, Зинат унинг норасмий иккинчи хотини бўлишига рози бўлган эди. Аммо турмуш ўртоғи ва унинг биринчи хотини томонидан тўхтовсиз калтакланган, ҳаттоки ўнг кўзига ҳам жиддий зарар етган. Бундан ташқари унинг эри ҳамиша карьерасига тўсқинлик қилар ва фильмлардаги иккинчи даражали роллар билан кифояланиши керак бўлган.
Иккинчи турмуш ўртоғи − Мажан Хон ҳам ҳамиша Зинатни калтаклашни одат қилган. Ўн икки йиллик турмушдан сўнг актриса икки фарзанд бўлса-да, ажрашиш учун ариза берган. Аммо суд жараёнида спиртли ичимликни хуш кўрадиган Мажан буйрак етишмовчилигидан вафот этган. Мажаннинг қариндошлари унинг ўлимида Зинатни айблаб, уйига бостириб келган. Унинг калтакланишида ўзининг 11 ёшли ўғли Азаннинг ҳам иштирок этиши актрисани узоқ вақт депрессияга дучор қилган. Шундан сўнг актриса ҳеч ким кутмаган қадамни ташлаган. Журналист сифатида ўзининг даҳшатли никоҳидан ҳикоя қилган. Яна ўн йиллик ҳаракатсизликдан сўнг Зинат яна кино оламига қайтди. Вақт ўтиб, унинг вояга етган ўғли Азан онасидан кечирим ҳам сўраган.
Димпл Кападия
Айнан Бобби роли ёш актрисага катта шуҳрат ва Болливуднинг нуфузли мукофотини олиб келган. Бироқ айнан шу шон-шараф унинг карьерасига нуқта қўйган, деса ҳам бўлади.
Шундан сўнг актриса таниқли актёр Ражеш Ханна эътиборини тортган ва унинг талабига биноан суратга тушиш ишларидан воз кечишга мажбур бўлган. Орадан 11 йил ўтиб, Кападия ва Ражеш ажрашган. Актриса эса яна экранларга қайтган. Актрисанинг икки нафар қизи бор, улар гарчи онаси каби машҳурликка эришмаган бўлса-да, актрисалик йўлини танлаган.
Изоҳ (0)