Актриса Вупининг машҳурлик чўққиси ўтган асрнинг 80–90 йилларига тўғри келган. Актрисанинг асл исми Керин Элайн Жонсон бўлиб, 1955 йил 13 ноябрда Нью-Йоркда ўқитувчи ва руҳоний оиласида туғилган. Ҳозирда Вупининг ёши 65 да ва у шу кунгача кўплаб ютуқларга эришган.
Вупи ёшлигида актёрлик бўйича ҳеч қандай таълим олмаган. Шундай бўлса-да, бу унга келажакда бир қанча мукофотларни қўлга киритишида тўсқинлик қилмади. У кино оламида ўз ўрнига эга актрисалардан бири ҳисобланади.
Табиатан иқтидорли бўлиб туғилган Вупи 8 ёшида болалар театрида рол ижро этишни бошлаган. Аммо унинг мактабда ўқиши жуда қийин бўлган, чунки унинг салоҳиятида бироз муаммолар бор эди.
14 ёшга кирганида уйдан чиқиб кетган Вупи гиёҳвандликка берилган ва уни биринчи турмуш ўртоғи − Элвин Мартин қутқарган. У бўлажак актрисани кўчада ухлаётганида топган ва уйғотиб, унинг қорнини тўйдирган. Агар гиёҳванд моддаларни қабул қилишни тўхтаца, актриса бўла олишига ишончини кучайтирган.
Шундан кейин улар бир оила бўлиб яшаган ва бир йилдан сўнг қизи Александра дунёга келган. Вупи 19 ёшида Сан-Диего шаҳридаги театрдан иш топиб, қизи билан кўчиб кетишга қарор қилган. Аммо унинг турмуш ўртоғи Нью-Йоркдан кетишни хоҳламаган. Вупи эса имкониятни қўлдан бой беришни истамасди.
Вупининг театрдаги фаолияти шу тарзда дастлаб Сан-Диего, кейин Сан-Францискода бошланган. Тобора маҳорати ўсиб бораётган Вупи бир куни моноспектакль тақдим этиб, унда бир ўзи 6 та образда намоён бўлган. Айнан ушбу спектакли билан актриса АҚШ, Европа ва Канадада ижодий сафарларда ҳам бўлди.
Кейинчалик унинг ижросидан мамнун бўлган Майкл Николс актрисани Бродвейга ишлашга таклиф қилди. Вупи эса у ерда аллақачон киноижодкорларнинг эътиборига тушиб улгурган эди.
1991 йил «Арвоҳ» фильмидаги роли учун актриса бирданига 3 та асосий мукофотга сазовор бўлган, шу жумладан, Оскарга ҳам. Кейинчалик у ўзи рол танлай бошлаган, чунки энди у маҳоратли актриса сифатида фикр билдиришга ҳақли эди.
«Голливуд худди инкубаторга ўхшайди, барчанинг юзи мукаммал, бурни кичкина ва тишлари текис. Аммо мен табиий ва бетакрорман», − дейди актриса.
Энг қизиғи, актриса қошларини доимо қириб юради. Чунки уларни қалин ва бўйсунмас деб билади. Вупи биринчи турмуш ўртоғи билан 6 йил яшаб, бошқа шаҳарга кўчганлиги туфайли ажрашган эди. Иккинчи турмуш ўртоғи – Дэвид Кассенга 1988 йил турмушга чиқди, 2 йилдан сўнг уларнинг турмуши бузилган. Тадбиркор Майкл Трахтенверг билан эса 1 йил оила бўлиб яшаган, холос.
«Мен ўз ҳис-туйғуларимни ҳеч ким бўлишишни истамадим. Муносабатлар эса бусиз бўлмайди. Никоҳ мен учун эмаслигини англашим учун жуда кўп вақт керак бўлди», − дейди актриса.
Вупи 18 ёшида она бўлган эди, 34 ёшида эса бувига айланди. Кейинчалик Вупининг набиралари яна иккитага кўпайди. Ва ниҳоят актрисага 58 ёшида катта набираси туфайли катта бувилик ҳам насиб этди. У комедия маликаси сифатида ҳанузгача томошабинларни ҳазилга бой ижролари билан завқлантириб келмоқда.
Изоҳ (0)