Warner Bros kinokompaniyasi 2021-yilda barcha filmlarni bir vaqtning o‘zida kinoteatrlar hamda HBO Max onlayn xizmatida namoyish etadi, deb xabar beradi Meduza.
Kinokompaniya yil davomida 17 ta film chiqarishni rejalashtirgan. Ular orasida “Uyum”, “Matritsa-4”, “O‘z joniga qasd qilish guruhi: Missiya zarbasi”, “Godzilla Kongga qarshi”, “Tom va Jerri”, “Mo‘jiza ayol” kabi filmlar o‘rin olgan. Shuningdek, kinokompaniya nega bunday qarorga kelganiga ham oydinlik kiritib o‘tdi, unga ko‘ra, yil oxiriga qadar tomoshabinlarning kinoteatrlarga to‘liq qaytishi kutilmayapti.
Ma’lum bo‘lishicha, AQShning HBO Max obunachilari Warner Bros premyeralarini ortiqcha to‘lovlarsiz tomosha qilishi mumkin. Rossiyada esa ushbu xizmat rasman mavjud emas.
Warner Bros premyeralarni bir vaqtning o‘zida kinoteatr hamda onlayn namoyish etishi, albatta, vaqtinchalik bo‘lib, bu 2021-yil oxiriga qadar rejalashtirilgan. Odatda yangi filmlar kinoteatrlardagi premyeradan 2-3 oy vaqt o‘tgachgina bu kabi platformalarda paydo bo‘lardi. Bundan tashqari, koronavirus pandemiyasi tufayli 2020-yil kinoteatrlarda namoyishi mo‘ljallangan yirik premyeralarning aksariyati bir necha oyga qoldirilgan.
Izoh (0)