Илон Маск ўзининг текиласини Teslaquila деб номламоқчи бўлган. Мексиканинг қаршилиги сабаб бошқа ном топишга тўғри келган

Шу йилнинг ноябрь ойида Tesla компанияси кичик серияда Tesla Tequila алкоголь ичимлигини ишлаб чиқаришни бошлагани ва дастлабки партия биринчи куннинг ўзидаёқ сотилиб кетгани тўғрисида хабар берилганди. The Verge’нинг ёзишича, аввалига алкоголли ичимликни Teslaquila деб номлаш режада бўлган.

«Теслакила» ҳақида биринчи бор Tesla раҳбари Илон Маск 2018 йилнинг апрелида гапирган эди. Илон Маскнинг Twitter’даги саҳифасида эълон қилинган ҳазил постда ёзилишича, Tesla банкрот бўлган, унинг ўзини эса Модель 3 электромобили ёнидан атрофига «Теслакила»нинг бўш шиша идишлари ташланган ҳолда маст аҳволда топишган.

Орадан бир неча ой ўтгач, у Twitter’га «Теслакила» яқин орада пайдо бўлишини ёзиб, Teslaquila ёзуви туширилган этикеткали бутилкани кўрсатган.

Бироқ гап товар белгисини рўйхатдан ўтказиш ҳақида кетганида, Мексика ҳукумати компанияга ўз маҳсулотини Teslaquila деб номлашга рухсат бермаган.

Таъкидланишича, «текила» сўзидан фойдаланиш ҳуқуқига фақатгина текила ишлаб чиқариш билан шуғулланадиган агросаноат комплексига тегишли. Муаммолар Teslaquila номи Tequila’га жуда ўхшашлиги сабаб келиб чиққан.

Текилага боғлиқ барча жараёнларни бошқариш кенгаши (CRT) Teslaquila сўзидан фойдаланиш чалкашликларни келтириб чиқариши ёки маҳсулотнинг пайдо бўлишига нисбатан тушунмовчиликларни юзага келтириши мумкинлиги тўғрисида қарор қабул қилган.

Маълумот учун, Мексикада Teslaquila брендини 2018 йилнинг майида рўйхатдан ўтказишга уринилган, бироқ 2019 йилнинг февралида CRT ўз эътирозини билдирган. 16 июлда эса Маск жамоаси Teslaquila сўзи янги эканлиги ва у Tesla ҳамда -қуила суффиксидан ҳосил бўлганини билдирган. Бироқ 16 ноябрда Tesla’га якуний рад жавоб берилган.