Американинг Арканзас штати Ньюпорт шаҳрида яшовчи 23 ёшли Честити Паттерсон 4 йил аввал отасидан айрилган. Паттерсон ота-онасини қаттиқ соғинганидан уларнинг эски телефон рақамига янгиликлар ҳақида хабар ёзади. «Салом дада, бу менман. Эртага яна қийин кун бўлади», − деб юборган хабарига сира ҳам жавоб кутмаган эди.
Унинг хабарлари вафот этганига 4 йил бўлган отасига бағишланган эди. У хабарда коллежни қандай тугатганлиги ва саратон касаллигини енгишга қодирлиги ҳақида ёзган. Шунингдек, қиз ҳали ҳам отасининг ўлими учун қайғураётганлиги ва уни жуда ҳам соғинганлигини яширмаган эди. Паттерсон хабарни юборганида кутилмаган жавоб олишини хаёлига ҳам келтирмаганди.
Бир куни «Салом, азизам. Мен сизнинг дадангиз эмасман, лекин шу тўрт йил давомида барча хабарларингизни олдим. Ҳаттоки уларни эрталабдан интиқлик билан кутардим», − дейилган жавоб хати келган. Бундан ташқари, номаълум эркак ўз қизи 2014 йил август ойида автоҳалокатда вафот этганлигини ҳам айтиб ўтган.
«Фақат сизнинг хабарларингиз ҳаётимни сақлаб қолишга ёрдам берди. Ҳар бир хатни Яратгандан деб қабул қилдим. Жуда ҳам яқин инсонингизни йўқотганингиздан афсусдаман. Ҳаёт йўлидаги тўсиқларни енгишингизни кузатдим. Мен ҳам қизимнинг сиз каби иродали аёл бўлишини жуда истар эдим», − дейилган жавобда.
Нотаниш инсоннинг жавобидан Паттерсон жуда таъсирланди ва Facebook’даги саҳифасига ёзишмаларнинг суратини жойлади. Ушбу пост юзлаб шарҳ ва чорак миллиондан ортиқ лайк йиғди.
Изоҳ (0)