Shu yilning noyabr oyida Tesla kompaniyasi kichik seriyada Tesla Tequila alkogol ichimligini ishlab chiqarishni boshlagani va dastlabki partiya birinchi kunning o‘zidayoq sotilib ketgani to‘g‘risida xabar berilgandi. The Verge’ning yozishicha, avvaliga alkogolli ichimlikni Teslaquila deb nomlash rejada bo‘lgan.
“Teslakila” haqida birinchi bor Tesla rahbari Ilon Mask 2018-yilning aprelida gapirgan edi. Ilon Maskning Twitter’dagi sahifasida e’lon qilingan hazil postda yozilishicha, Tesla bankrot bo‘lgan, uning o‘zini esa Model 3 elektromobili yonidan atrofiga “Teslakila”ning bo‘sh shisha idishlari tashlangan holda mast ahvolda topishgan.
Oradan bir necha oy o‘tgach, u Twitter’ga “Teslakila” yaqin orada paydo bo‘lishini yozib, Teslaquila yozuvi tushirilgan etiketkali butilkani ko‘rsatgan.
Biroq gap tovar belgisini ro‘yxatdan o‘tkazish haqida ketganida, Meksika hukumati kompaniyaga o‘z mahsulotini Teslaquila deb nomlashga ruxsat bermagan.
Ta’kidlanishicha, “tekila” so‘zidan foydalanish huquqiga faqatgina tekila ishlab chiqarish bilan shug‘ullanadigan agrosanoat kompleksiga tegishli. Muammolar Teslaquila nomi tekilaga juda o‘xshashligi sabab kelib chiqqan.
Tekilaga bog‘liq barcha jarayonlarni boshqarish kengashi (CRT) Teslaquila so‘zidan foydalanish chalkashliklarni keltirib chiqarishi yoki mahsulotning paydo bo‘lishiga nisbatan tushunmovchiliklarni yuzaga keltirishi mumkinligi to‘g‘risida qaror qabul qilgan.
Ma’lumot uchun, Meksikada Teslaquila brendini 2018-yilning mayida ro‘yxatdan o‘tkazishga urinilgan, biroq 2019-yilning fevralida CRT o‘z e’tirozini bildirgan. 16-iyulda esa Mask jamoasi Teslaquila so‘zi yangi ekanligi va u Tesla hamda “-quila” suffiksidan hosil bo‘lganini bildirgan. Biroq 16-noyabrda Tesla’ga yakuniy rad javob berilgan.
Izoh (0)