Аёллар гардеробидан ҳамиша асосий либослар топилади. Улар ҳар қандай вазиятда, масалан, театр ёки учрашувга тўсатдан бориш керак бўлган вақтда ёрдам беради. Яъни уларни ҳар қандай ҳолатда ҳам кийиш мумкин ва турли хил услубга ҳам мос келади.
Оқ кофта
Оқ кофта – классик услуб бўлиб, уни ҳар қандай кийим билан мослаштириш мумкин. Масалан, кенг шим, чарм юбка ва бошқалар. Кўпгина юлдузлар – Виктория Бекҳэм ундан моҳирона фойдаланади. Оқ кофта танлашда кўпроқ безак ва чўнтакларсиз бўлишига аҳамият бериш керак. Бу услубдаги кофталар оч ва тўқ рангдаги либослар билан ажойиб комбинацияни ҳосил қилади.
Свитер
Ўтган асрнинг 70 йилларида мода оламига кириб келган свитерлар ўша вақтдан бери урфдан қолмади. Уни турли хил рангдаги юбкалар билан уйғунлаштириб, ажойиб кўйлаклар яратиш мумкин. Шунингдек, уни сарафан, калта ва узун курткалар билан кийиш ҳам мумкин. Айниқса, тўқ рангдаги свитерлар қоматни янада ихчамроқ кўрсатади, ёрқин рангдагилари эса қиш фаслида ҳам баҳорий кўриниш бахш этади.
Футболка
Гардеробдаги энг асосий кийим. Енгил устки кийим ва кардиган остидан ҳам уларни кийиш мумкин. Улар доимо ҳар қандай аёлнинг гардеробидан топиш мумкин. Шунингдек, уларнинг нархлари бошқа либослар каби қиммат ҳам эмас. Айниқса, оқ рангдагиси барча спорт кийимлари билан ажойиб уйғунликни ҳосил қилади.
Жемпер
Тўқилган ёки трикотаж матоли жемперлар ҳам яна бир ёрдамчи либослар сирасига киради. Ҳозирда қиш фасли бўлишига қарамай, уни юбкалар билан кийиш урфга айланди. Шунингдек, кенг ҳажмдаги жемперларни жинси ва бошқа матоли шимлар билан ҳам уйғунлаштириш мумкин.
Кўйлак
Мода оламида ҳар бир аёлнинг гардеробида қора рангли либос бўлиши керак, деган қараш мавжуд. Албатта, у қоматни ихчам қилиб кўрсатадиган соддагина бичимда бўлиши керак. Узунлиги тиззадан ёки бироз юқорироқ моделларни танлаш тавсия этилади. У қанчалар оддий бўлса, қолгани уни тўлдирувчи аксессуар билан бойитилади. Бу каби либосни баланд пошнали пойабзал, пальтолар билан ёки куртка ва оқ крассовка билан ҳам мослаштириш мумкин.
Изоҳ (0)