Қишки образ яратамиз: юбка билан қандай куртка кийган ва киймаган яхши?

Бугунги кунда исталган услуб ва бичимдаги кийимни бошқа бир кийим билан мослаш урфда. Сиз ҳеч ҳам иккиланмасдан аёлларга хос латофатли кўрсатадиган бичимли либос, хусусан, юбка билан oversize бичимли ёки бошқа бир услубдаги қишки курткани умумлаштиришингиз мумкин. Аммо уларнинг иккови «чиқишиши» учун мавжуд қоидаларга амал қилиш керак.

Асосий қоида

Агар куртка ҳам юбка ҳам бир рангда бўладиган бўлса, узунлик борасида қайғуришингизга ҳожат қолмайди. Аммо ундай бўлмайдиган бўлса, куртка ва юбка узунлиги орасидаги фарқ 20-30 сантиметрдан ошмаслиги керак.

Йўқса сизнинг бўйингиз ва кўринишингиз кўнгилдагидек кўринмайди. Қишки кийим шундоқ ҳам қоматни тўлароқ кўрсатади. Образ танлаганда шуни инобатга олган ҳолда моделларга эътибор қаратиш керак.

Миди узунлигидаги юбка билан тизза ёки бўксагача бўлган узунликдаги куртка кийиш сизни бўйи паст қилиб кўрсатади. Яхшиси бир рангда мосланг, рангнинг ёрқинлик даражаси фарқ қилиши мумкин. Бир рангда кийиниш бўйни баландроқ қилиб кўрсатиш хусусиятига эга. Ёрқин рангли куртка билан принтли юбка танлаш ҳам яхши вариант. Агар юбканинг асоси қолиб принтининг ранги курткага мос бўлса, яна ҳам яхши. Бунда нафақат образингиз чиройли кўринади, балки узунлик ва куртканинг қалинлигига ҳам қарамай бўйингиз одатдагидан баландроқ ва қоматингиз пропорционал кўринади.

Идеал образ фақатгина юбка ва куртканинг узунлигида эмас, уларнинг бичими мувофиқини танлай билиш ва мослашга ҳам боғлиқ. Қалин ва калта куртка тананинг юқори қисмини йирик қилиб кўрсатади. Бундай куртка ҳисобига юбкани қоматни А кўринишида кўрсатадиганидан танлаш керак.

Агар бундай куртка билан ёпишиб турадиган калта юбка кийилса, қўллар йирик, елкалар кенг ва оёқлар ингичка бўлиб, «качок»ларга ўхшаб қолишингиз мумкин. Агар худди шундай куртка билан тўғри бичимли юбка кийишни истасангиз, унда болдиргача бўлган ва камарли вариант танланг.

Рангларни бир-бирига мослашдан чўчиманг. Бу сизни образингизни эсда қоларли ва дидли кўринишига сабаб бўлиши мумкин. Бахмал, чарм ҳатто ипак матосини ҳам қишки курткалар билан ҳам ноодатий услубда кийиниш мумкин.

Аксари йўл қўйиладиган хатолар

Матоси бўшашган, осилиб турадиган куртка билан ҳеч қандай эсда қоларли образ яратиб бўлмайди. Биринчидан, бундай модель сизни қишки ҳароратда иссиқ тутишига ишонч йўқ, иккинчидан, қоматингиз пропорцияси хунук кўринади.

Мини юбка билан эса узунроқ куртка кийган яхши. Юбканинг калтароғи билан узун юбка яхши туриши мумкин, лекин иккаласининг бир узунликдагиси тавсия қилинмайди.

Мини юбка билан белбоғ ёки камарли, қолаверса, этаги кенг куртка кийиш ҳам хато. Бу бўксани кенг қоматни эса тўла кўрсатади.

Қуйидаги сурат куртка ва юбка орасидаги катта фарқ бўйни қанчалик паст кўрсатишининг яққол исботи.