АҚШ Адлия вазирлиги президент томонидан афв этилиши учун пора олганлик эҳтимоли ҳақидаги ишни текширмоқда, деб ёзади Meduza.
The Guardian нашри таянаётган ҳужжатда Дональд Трамп тилга олинмайди, Америка Адлия вазирлигида айтишларича, АҚШ мансабдорларидан ҳеч бири текширув «объекти ёки мақсади» бўлмаган.
Вазирлик маълумотларига кўра, ушбу схема «президент томонидан афв этилиш ёки ҳукмни кечиктириш эвазига берилган катта сиёсий тўлов»ни кўзда тутади.
Текширув ҳақидаги хабар Дональд Трамп президент лавозимидан кетгунига қадар бир неча кишини афв этиш режалари ҳақида эълон қилинган бир пайтда тарқалган.
Трамп эса Twitter’да текширув ҳақидаги янгиликни ёлғон деб атади.
Аввалроқ Дональд Трамп рақиби, Демократлар партиясидан номзод Жо Байден сайловчилар (сайлов ҳайъати аъзолари)нинг кўпчилик овозини қўлга киритса, Оқ уйни тарк этишини маълум қилган эди. Шу билан бирга, у 2024 йилда давлат раҳбари лавозимига ўз номзодини қўйиши мумкинлигини билдирди.
АҚШда президент сайловлари 3 ноябрь куни бўлиб ўтди. Дастлабки маълумотларга кўра, Жо Байден ғолиб бўлган. Унинг ғалабасини 14 декабрь куни сайловчилар ҳайъати узил-кесил тасдиқлаши керак.
Дональд Трамп ўз мағлубиятини тан олишдан бош тортди. Унинг ҳуқуқшунослари қатор штатларда сайловлар натижаларини қайта кўриб чиқиш ҳақида даъволар берди, аммо уларнинг Байденнинг фойдасига катта кўламда фирибгарликлар амалга оширилгани ҳақидаги гаплари ўз тасдиғини топмади.
Изоҳ (0)