Харков вилоятида бир кечанинг ўзида учта автомобилни миниб қочган 14 ёшли ўсмир аварияга учради. Вояга етмаган йигитчанинг сўзларига кўра, у машина ҳайдашни ўрганмоқчи бўлган, деб хабар беради Motor.
Аввалига харковлик 14 ёшли йигит «Буханка»ни миниб қочган. Ўсмир бошқарувни эплай олмаган ва хусусий уйлардан бирининг панжарасига бориб урилган. Шундан сўнг у автотураргоҳдаги «ВАЗ-2121»ни миниб қочишга муваффақ бўлган, бироқ кўп ўтмай уни дарахтга бориб урган. Учинчи сафар миниб қочилган автомобиль — Volkswagen Transporter. Бироқ бу сафар ҳам мактаб ўқувчисига яшил майдонлар халақит берган.
14 ёшли ўсмир қандай қилиб учала автомобилни ҳам ўт олдиргани маълум эмас. Йигитчанинг сўзларига кўра, у доим машина ҳайдашни ўрганишни истаган, аммо ҳеч қачон имконияти бўлмаган. Шу сабабли у жиноят содир этишга қарор қилган. Айни вақтда полиция ходимлари ўсмирни қўлга олган бўлиб, у беш йилгача озодликдан маҳрум этилиши мумкин.
Эслатиб ўтамиз, октябрь ўрталарида Американинг Луизиана штатида 11 яшар бола мактаб автобусини олиб қочган эди.
Изоҳ (0)