Ҳиндистоннинг Tata автомобилсозлик компанияси ўз автомобилларини вирус ва инфекциялардан ҳимоялашнинг янги усулини ўйлаб топди. Сотишга мўлжалланган барча машиналар ўз эгаларини герметик пластик пуфаклар ичида кутиб туради, деб хабар беради Motor.
Ҳиндистон компаниясининг мутахассислари ҳимоялашнинг янги усулини дилерлик маркази ходимлари автомобилларга иложи борича камроқ тегиниши учун ўйлаб топган. Ҳиндистон ҳозирда коронавирусга чалинганлар сони бўйича дунёда иккинчи ўринда эканлиги сабаб бу каби шиширма «гараж» потенциал харидорларни автомобиль юзасига тегиниш орқали вирус юқтириб олиш эҳтимоллигидан ҳимоялайди.
Компания вакилларининг сўзларига кўра, «хавфсизлик пуфаги» машина заводдан чиқиб, харидорга етиб боргунга қадар унинг барча қисмини микроб ва вирусдан ишончли ҳимоялашни кафолатлайди. Автомобильни пластик контейнерга қадоқлашдан олдин у яхшилаб ювилиб, дезинфекция қилинади.
Янги хавфсизлик технологияси асосида биринчи бўлиб Tata Tiago хэтчбеки сотилди. Стерилланган пласик капсулада у дилерлик марказига етказилган.
Эслатиб ўтамиз, ноябрь охирида Mitsubishi’нинг Америкадаги офиси дилерлик марказлари билан ҳамкорликда коронавирусга қарши курашнинг янги усулини таклиф этганди. Эндиликда машинанинг маркаси ва моделидан қатъи назар, исталган инсон Diamond Premium Care хизматидан фойдаланиши ва салонга АҚШ Атроф-муҳитни қўриқлаш агентлиги (EPA) томонидан тасдиқланган дезинфекцияловчи воситалар билан ишлов бериши мумкин.
Изоҳ (0)