Mitsubishi’ning Amerikadagi ofisi dilerlik markazlari bilan hamkorlikda koronavirusga qarshi kurashning yangi usulini taklif etdi. Endilikda mashinaning markasi va modelidan qat’iy nazar, istalgan inson Diamond Premium Care xizmatidan foydalanishi va salonga AQSh Atrof-muhitni qo‘riqlash agentligi (EPA) tomonidan tasdiqlangan dezinfeksiyalovchi vositalar bilan ishlov berishi mumkin, deb yozadi Motor.

Foto: Motor

Mitsubishi Motors North America bu kabi xizmatni jamoatchilik darajasida taklif etgan birinchi kompaniyaga aylandi. Salonni va avtomobil iqlim tizimini dezinfeksiya qilish uchun u EPA tomonidan sertifikatlashtirilgan Diamond Premium Care ko‘p funksiyalari spreyidan foydalanadi. Mazkur sprey mikroblarni o‘ldirish va yoqimsiz hidlarni yo‘qotish imkoniyatiga ega bo‘lib, u BioPledge firmasi tomonidan yaratilgan.

Spreyning samaradorligi — 99,9 foiz. U deyarli barcha bakteriya va viruslarni, jumladan, koronavirus infeksiyasining qo‘zg‘atuvchisi bo‘lgan SARS-CoV-2’ni ham o‘ldiradi, faqat qattiq va g‘ovaksiz yuzalarda. Mashinaga ishlov berishga o‘rtacha 10 daqiqa talab etiladi. Mashina interyeri uning ichidagi elementlarga to‘g‘ridan to‘g‘ri sprey sepish orqali, iqlim tizimi esa tashqaridan havo kiruvchi panjara teshiklari orqali qayta ishlanadi. Bu kabi xizmat narxi 19,95 dollardan boshlanadi.

Eslatib o‘tamiz, mart oyida Xitoyning Geely kompaniyasi koronavirusga qarshi himoyaga ega krossover ishlab chiqarishni boshlagani va ushbu modelga bir sutkada 30 mingta buyurtma kelib tushgani to‘g‘risida xabar berilgandi.