Висконсин штати демократ Жо Байденнинг АҚШ президенти сайловларидаги ғалабасини тасдиқлади, деб ёзади Meduza. Бу ҳақда штат губернатори Тони Эверс баёнот берган.
Висконсин Байденнинг ғалабасини унинг рақиби, амалдаги президент Дональд Трамп талаби билан иккита округда овозлар қайта санаб чиқилганидан кейин тасдиқлади. Қайта ҳисоблаш натижасида Байденнинг ҳисобига 74 та овоз қўшилди.
Bloomberg’нинг ёзишича, Висконсин Трамп ўз мағлубиятига қарши чиққан ва кейинроқ Байденнинг ғалабасини тасдиқлаган «иккиланувчи» штатларнинг сўнггиси бўлди. Демократнинг ғалабаси ҳақида аввалроқ Аризона, Пенсильвания, Мичиган, Невада ва Жоржия расман эълон қилган эди.
АҚШда президент сайловлари 3 ноябрь куни бўлиб ўтди. Дастлабки маълумотларга кўра, Жо Байден ғолиб бўлган. Унинг ғалабасини 14 декабрь куни сайловчилар ҳайъати узил-кесил тасдиқлаши керак.
Дональд Трамп ўз мағлубиятини тан олишдан бош тортди. Унинг ҳуқуқшунослари қатор штатларда сайловлар натижаларини қайта кўриб чиқиш ҳақида даъволар берди, аммо уларнинг Байденнинг фойдасига катта кўламда фирибгарликлар амалга оширилгани ҳақидаги гаплари ўз тасдиғини топмади.
Кейинроқ Дональд Трамп маъмурияти Жо Байденга ҳокимиятни топширишга тайёрлигини билдирган эди. Шундан кейин Байден ўз маъмуриятининг асосий аъзоларини шахсан таништирди. Шунингдек, демократ Жозеф Байденга разведка томонидан давлат раҳбари учун тайёрланадиган кунлик махфий ҳисоботларни тақдим этишга рухсат берилди.
Дональд Трамп рақиби, Демократлар партиясидан номзод Жо Байден сайловчилар (сайлов ҳайъати аъзолари)нинг кўпчилик овозини қўлга киритса, Оқ уйни тарк этишини маълум қилди. Айни вақтда Трамп, унинг фикрича, сайловлар қалбакилаштирилганини яна бир марта таъкидлади ва сайлов ҳайъати аъзоларининг Байденга овоз бериши катта хато бўлишини айтди.
Изоҳ (0)