Бутун дунёда бир ҳафта ичида янги коронавирус инфекцияси билан касалланиш ҳолатларининг сони сентябрь ойининг бошидан бери биринчи марта камайди. Бу ҳақда Жаҳон соғлиқни сақлаш ташкилоти (ЖССТ) бош директори Тедрос Гебрейесус айтиб ўтди, деб ёзмоқда Meduza.
Гебрейесуснинг сўзларига кўра, Европанинг аксарият мамлакатларида кўрилган «қаттиқ, аммо зарур чоралар» туфайли касалланиш даражасининг пасайиши кузатилган.
Шу билан бирга, Гебрейесус бошқа минтақаларда касалланишнинг ўсиши давом этаётганини таъкидлади.
Европада октябрь ойининг охиридан ноябрь ойининг бошигача аксарият давлатлар у ёки бу шаклда миллий чекловлар эълон қилди. Коронавирусга қарши кураш чоралари доирасида таълим муассасалари ёпилди, кафе ва ресторанларнинг иши чекланди, айрим мамлакатларда комендантлик соати жорий этилди.
Кучли чекловлар фонида Испания, Франция, Бельгияда кунлик касалланиш октябрь ойининг охирида энг юқори кўрсаткичлардан 3—5 баравар, Буюк Британия ва Италияда 1,5 баравар камайди, Германияда ўсиш тўхтади ва вазият барқарорлашди.
Дунёда коронавирус билан касалланишнинг рекорд кўрсаткичи 13 ноябрда қайд этилган — 662 мингдан ортиқ ҳолат. Сўнгги кунларда ҳар куни 600 мингдан кам янги ҳолат қайд этилган.
Изоҳ (0)