Американинг Merriam-Webster луғати «пандемия»ни 2020 йил сўзи деб топди

Американинг Merriam-Webster изоҳли луғати тузувчилари «pandemic» (пандемия) сўзини 2020 йил сўзи деб топди, деб хабар берди Meduza.

Бу сўз луғат сайтида энг оммабоп бўлган. 11 март куни, ЖССТ коронавирус тарқалишини пандемия деб эълон қилганидан сўнг, Merriam-Webster сайтида ушбу сўзни қидириш бир йил аввалги шу кунга нисбатан 115,806 фоизга ошган.

Луғат фойдаланувчилари томонидан энг кўп қидирилган 11 сўз орасида қуйидагилар бўлган: coronavirus (коронавирус), defund («молиялаштиришни қисқартириш»), Маmba («Мамба»), Kraken («Кракен»), quarantine («карантин»), antebellum («урушдан аввалги»), schadenfreude («ичиқоралик»), asemptomatic («симптомсиз»), irregardless («...га қарамай»), icon («икона») ва malarkey («сафсата»).

2019 йили Merriam-Webster луғати йил сўзи деб they («улар») сўзини танлаган.

Оксфорд луғати бу йил 16 та сўзни йил сўзи сифатида танлаб олди. Улар орасида «пандемия» сўзи йўқ, аммо COVID билан боғлиқ бошқа сўзлар мавжуд, масалан, «коронавирус» ва «локдаун». Шунингдек, Оксфорд луғати рўйхатига пандемия билан боғлиқ бўлмаган сўзлар ҳам киритилган, масалан, «бекор қилиш маданияти» ва «белоруслик».

Аввалроқ инглиз тилининг яна бир нуфузли луғати Collins English Dictionary 2020 йилнинг асосий сўзи сифатида lockdown’ни танлаганди. Буюк Британиянинг Collins луғати «локдаун»ни йил сўзи деб топган. Россияда эса «самоизоляция» 2020 йил сўзи деб топилди.