Сурхондарё вилояти Денов тумани ҳудудидан ўтувчи 4Р-100 автомобиль йўлининг 166-километрида Nexia-3 автомобили оғир йўл-транспорт ҳодисасига учради, деб хабар беради ИИВ ЙҲХББ ахборот хизмати.
Маълумотларга кўра, автомобиль ҳайдовчиси меъёридан ортиқ юқори тезликда ҳаракатлангани сабаб йўлнинг хавфли бурилиш қисмида бошқарувни йўқотиб, дарахтга урилган.
Аниқланишича, машина ичида бўлган фуқаролар шу куни Шўрчи туманидаги ошхонада кечаси соат 03:00 гача ўтириб, спиртли ичимлик ичган.
ЙТҲ оқибатида машина ичида бўлган икки киши олинган тан жароҳатлари оқибатида вафот этган ва яна бир йўловчи оғир аҳволда шифохонага олиб борилган.
Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми билан жиноят иши қўзғатилган бўлиб, терговга қадар суриштирув ишлари давом этмоқда.
Аввалроқ Бандихон туманининг «Обикор» маҳалласидан ўтувчи 4Р-100 автомобиль йўлининг 125-километрида Cobalt автомобилининг аварияга учраши оқибатида бир киши ҳалок бўлгани ва йўловчилардан икки нафари тан жароҳат олгани тўғрисида хабар берилганди.
Изоҳ (0)