Туркманистон президенти Гурбангули Бердимуҳамедов Жо Байденни АҚШда бўлиб ўтган президентлик сайловларидаги ғалаба қозонгани билан табриклади. Бу ҳақда Туркманистон давлат ахборот агентлиги хабар берди.

Фото: «Кремлin.ru»

«Туркманистон ва АҚШ ўртасидаги дўстлик, ҳамфикрлик ва ўзаро манфаатли шериклик муносабатлари икки давлат халқлари равнақи учун келгусида ҳам мустаҳкамланиб боришига ишончим қатъий», — дейилади Бердимуҳамедовнинг Байденга йўллаган мактубида.

Бердимуҳамедов ўз мактубида Туркманистон АҚШ билан ҳозирги муносабатлар даражасини юқори баҳолашини ва икки томонлама ҳамкорликнинг тенг ҳуқуқлик, ўзаро ҳурмат ва ўзаро манфаатлар ҳимояси тамойиллари асосида янада оширилишига катта аҳамият беришини таъкидлаб ўтган.

Аввалроқ Туркия президенти Ражаб Тоййиб Эрдўғон ва БМТ бош котиби Антониу Гутерриш, Жанубий Корея президенти Мун Чже Ин, Хитой раиси Си Цзиньпин Жо Байденни АҚШ президентлиги сайловидаги ғалаба билан табриклагани ҳақида хабар берилганди.

Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.