Туркия ташқи ишлар вазирлиги эронлик ядро физик Муҳсин Фахризоданинг ўлдирилиши туфайли минтақадаги вазиятни кескинлаштирмасликни сўради, деб ёзади «РБК». Эрон ядро дастури яратувчиларидан бири сифатида машҳур бўлган олим 27 ноябрь куни суиқасд оқибатида Теҳрондаги касалхонада вафот этган эди. Туркия ТИВнинг муносабати идора сайтида эълон қилинди.
«Биз барча томонларни оқилона ва вазминлик билан ҳаракат қилиб, минтақада низони кучайтиришга олиб келувчи ишларга қўл урмасликка чақирамиз», — дейилади хабарда.
ТИВ қотилликни қоралаб, марҳумнинг оиласига ва Эрон ҳукуматига таъзия билдирди.
Эроннинг Fars ва Tasnim агентликлари маълум қилишича, Теҳронда суиқасд уюштирилган ҳудудда камида бир марта портлаш овози эшитилган, шундан кейин ҳужум қилган шахслар Фахризоданинг машинасини ўққа тутган. Эрон Мудофаа вазирлиги олимнинг «хавфсизлик жамоаси ва террорчилар ўртасидаги тўқнашувлар чоғида» оғир яраланганини маълум қилган. Олим касалхонага ётқизилган, аммо олган жароҳатлари оқибатида вафот этган.
Эрон ташқи ишлар вазири Жавод Зариф олимнинг ҳалокатига Исроил алоқадор бўлиши мумкинлигини маълум қилди. Эрон олий етакчиси маслаҳатчиси Ҳусайн Деҳқон қотилликда айбдорларга қатъий жавоб чораси кўрилишини айтди.
Фахризода Эрон ядро дастурининг етакчи ишлаб чиқарувчилардан бири эди, 2018 йилда Исроил бош вазири Бинямин Нетаньяху олимни Теҳроннинг барча ядро лойиҳасининг раҳбари эканлигини айтган. ОАВлар уни «Эронлик Оппенгеймер» ва «Эрон бомбасининг отаси» деб атаган. Қайд этиш жоизки, Эронда ядро қуроли ҳозирча яратилмаган.
Изоҳ (0)