Андижонда қизининг ўлимига сабабчи йигитдан Spark ундирилмаётганлигидан норози она прокуратура биноси олдида ўзини ёқиб юборди

Андижон вилоятининг Марҳамат туманида ўзини осиб ўлдирган қизнинг онаси унинг ўлимида айбдор шахснинг Spark’ини зарар ҳисобига ундириб беришни талаб қилиб, прокуратура биноси олдида ўзини ёқиб юборди. Бу ҳақда Бош прокуратура матбуот хизмати хабар берди.

Маълум бўлишича, 2020 йил 24 июль куни соат 23:00 ларда Марҳамат тумани, Садоқат кўчасида яшовчи 21 ёшли Н.М. севган йигитини кутиб турган вояга етмаган қиз Т.М.ни уяли телефонига расмга олиб, ушбу фотосуратларни унинг ота-онаси ва профилактика инспекторига кўрсатишини айтган.

Ушбу маълумотлар бошқаларга ошкор бўлишидан қўрққан қиз ўзини осиб, жонига қасд қилган. Ҳолат юзасидан Жиноят кодексининг 141-1-моддаси (шахсий ҳаёт дахлсизлигини бузиш) билан жиноят иши қўзғатилган ва ҳозирда тергов ҳаракатлари олиб борилмоқда.

Марҳуманинг онаси С.Б. олиб борилаётган тергов ҳаракатларидан норози бўлиб, 2020 йил 30 ноябрь куни соат 12:15 ларда Андижон вилоят прокуратурасига келган ва вилоят прокурорининг биринчи ўринбосари Ф.Раҳмонов томонидан қабул қилинган.

Фуқаро С.Б. қабул жараёнида терговчи томонидан уларнинг талаблари бажарилмасдан, унинг фикрича қизининг вафотига айбдор бўлган Н.М.дан етказилган зарар ҳисобига Spark автомашинаси ундирилмаётганлигидан норозилигини билдирган.

Вилоят прокурорининг биринчи ўринбосари Ф.Раҳмонов қабул жараёнида жиноят иши бўйича тергов ҳаракатлари давом этаётганлиги, Spark автомашинасини ундириш тергов органларининг ваколатига кирмаслигини, тергов якуни бўйича барча айбдор шахсларга нисбатан қонуний чоралар кўрилишини тушунтирган.

Олинган жавобдан қониқиш ҳосил қилмаган қизнинг онаси С.Б. Spark автомашинаси ундирилмаган тақдирда ўзига ўт қўйиб, жонига қасд қилишини билдириб, вилоят прокуратурасини тарк этган. Вазият кескинлашуви ва бошқа ҳолатларнинг олдини олиш учун Андижон вилоят ИИБ пост-патруль хизмати ходимлари вилоят прокуратурасига чақирилган.

Шундан сўнг шу куни соат 13:20 ларда аёл вилоят прокуратураси автомашиналар тураргоҳида бақириб, бошқа шахсларни ўзига жалб қилиб, турмуш ўртоғи Х.Т.дан 1 литрли пластмасса идишда бўлган бензин ва гугуртни олиб, ўзининг елка қисмларига қуйган ва турмуш ўртоғи Х.Т. дан ўзини ёқиши ва вилоят прокуратураси биноси ичига югуриб кириб кетиши ҳақида кўрсатма олганидан сўнг ўзига ўт қўйиб ёқиб юборган.

Шу вақтда воқеалар ривожини кузатиб турган Андижон вилоят ИИБ пост-патруль хизмати ходимлари аёлнинг эгнида ёнаётган кийимлари ечиб олиниб, унинг куйиб оғир тан жароҳати олишининг олди олинган.

Айни вақтда аёлнинг юзи, қўллари, бўйин ва кўкрак қафаси соҳалари жами танасининг 15 фоиз қисми куйиш ташхиси билан шифохонага жойлаштирилган.

Мазкур ҳолат бўйича Андижон шаҳар прокуратураси томонидан терговга қадар текширув ҳаракатлари олиб борилмоқда.