Ўзбекистоннинг Ядро тадқиқотлари бирлашган институтига (ЯТБИ) тўлақонли аъзолиги 2021 йил 1 январдан тикланади. Бу қарор 23 ноябрь куни ўтказилган Ядро тадқиқотлари бирлашган институти (ЯТБИ, Дубна, Россия) аъзо давлатлари мухтор вакиллар қўмитасининг йиллик сессиясида қабул қилинган. Бу ҳақда Фанлар Академияси матбуот хизмати хабар берди.
2015 йилда мамлакатнинг институтга тўлақонли аъзолиги унинг олдидаги қарзлари сабаб тўхтатилган эди. Айни вақтда қарзнинг 60 фоиздан ортиғи қопланган. Қолган қисми 20 йил давомида тўланади.
Ядро тадқиқотлари бирлашган институти – бу йирик халқаро ҳукуматлараро ташкилот бўлиб, у 1956 йилнинг мартида 11 та иштирокчи давлат томонидан яратилган ва 1957 йилнинг 1 февралида БМТда рўйхатдан ўтказилган. Ўзбекистон 1992 йилдан буён ЯТБИ аъзоси ҳисобланади.
Ҳозирда Ядро тадқиқотлари бирлашган институтига Озарбайжон, Арманистон, Беларусь, Болгария, Вьетнам, Грузия, Қозоғистон, КХДР, Куба, Молдова, Мўғулистон, Польша, Россия, Руминия, Словакия, Ўзбекистон, Украина, Чехия — 18 та давлат таъсисчи-аъзо бўлган.
Ўзбекистоннинг ЯТБИга тўлақонли аъзолиги маҳаллий мутахассисларнинг йирик халқаро лойиҳаларда иштирок этишини таъминлайди ҳамда ядро технологиялари, ядровий тиббиёт, ахборот технологиялари ва материалшунослик йўналишларида юқори малакали кадрлар тайёрлашда кенг имкониятлар яратади.
Изоҳ (0)