Беларусь президенти Александр Лукашенко хорижий мамлакатлар элчиларига ишонч ёрлиқларини топшириш вақтида ўзини давлат ҳукуматидан узоқлаштиришнинг фақат битта йўли борлиги ҳақида гапирди, дея хабар қилган БелТА.
«Бу ишни фақат Беларусь халқи қилиши мумкин ва ҳаммаси мамлакат конституциясига мувофиқ амалга ошади», — деган Лукашенко.
«Сўнгги вақтларда ғарб давлатлари Беларуснинг келажаги борасида хавотирланмоқда, улар қаттиқ куюниб Беларусь ҳукумати ва президентига қарши чоралар кўриб, мавжуд тузумни ўзгартиришга уринмоқда. Шу даражага етишдики, ушбу жараёнга Россияни ҳам аралаштиришмоқда, бироқ улар менинг ушбу баёнотни, Хитойда айтилганидек, темир фактлар асосида бераётганимни билмайди», — дея қайд этган Беларусь президенти.
Шунингдек, Лукашенко мамлакатда айни вақтдаги ҳолатни турлича баҳолаш мумкин бўлса-да, беларуслар мамлакат суверенитети, миллий қадриятлар ва ҳудудий яхлитликни сақлашга қодир эканини намойиш қилганини билдирган.
Беларусда 2020 йил 9 августдан буён президентлик сайловларидан кейин бошланган норозилик намойишлари давом этмоқда. Беларусь МСК Лукашенкони сайловлар ғолиби деб топган, асосий рақобатчи, мухолифат вакили Светлана Тихановская эса расмий маълумотларга кўра 10 фоиз овоз олган. Тихановскаяни Европа давлатлари қўллаб-қувватламоқда. Тихановская мағлубиятини тан олмаган ва ўзини «Беларусь халқи томонидан сайланган ягона етакчи» деб атаган. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган. Лукашенко бир неча марта сайловлар ҳалол ўтгани ҳақида гапирган, Москва ҳам унинг президентликка сайланганини тан олган.
Лукашенкога қаршилар ҳанузгача кўчаларга чиқиб ўз норозилигини билдирмоқда. 22 ноябрнинг ўзида Минскдаги митинглар вақтида сайловлардаги натижаларни бекор қилиш ва қайтадан ўтказишни талаб қилаётганлар орасидан 300 дан зиёд киши ҳибсга олинган. Инсон ҳуқуқлари ҳимоячилари ҳибсга олинганларнинг бир қисми тез ёрдам машиналарида олиб кетилганини қайд этган.
Ноябрь ўрталарида Минскдаги фаоллардан бири Роман Бондаренконинг ҳалок бўлгани хабар қилинган. У ўз уйи ёнида, ҳовлида ниқоб таққан фуқаролик кийимидаги нотаниш нусхалар томонидан калтакланган ва кейинчалик шифохонада вафот этган. Бош прокуратура содир бўлган воқеа ҳақида гапирган тез ёрдам ходимининг маълумотлари ишончли эмаслигини билдирган.
Лукашенко президентлик ваколатларининг 70-80 фоизини Парламент, ҳукумат ва бошқа тузилмаларга беришни ваъда қилган.
«Ҳукумат ушбу масалаларни ҳар томонлама ўрганиб чиқмоқда, яъни ИИВ, ДХҚ, губернаторлар, маҳаллий ҳокимлик органлари буни муҳокама қилиб, Парламентда ҳам дебатлар қилинг, қонун доирасида қарор чиқариб, қонунни президент имзоси учун киритинг», — деганди Лукашенко.
Изоҳ (0)