Бош прокуратура ҳузуридаги Иқтисодий жиноятларга қарши курашиш департаменти Бектемир туман аҳоли бандлигига кўмаклашиш маркази директорини пора олаётган пайтда ушлади. Бу ҳақда Бош прокуратура матбуот хизмати «Дарё»га маълум қилди.
Идора маълумотларига кўра, марказ директори М.А. фуқаро Ш.А.нинг турмуш ўртоғини юқори лавозимда ишловчи танишлари орқали Тошкент шаҳридаги туғруқ комплексларидан бирига раҳбар лавозимини эгаллашига ёрдам бериш эвазига фирибгарлик йўли билан 30 минг АҚШ доллари талаб қилган. М.А шундан 10 минг долларни олган вақтида ашёвий далил билан қўлга олинди.
Мазкур ҳолат юзасидан М.А.га нисбатан Жиноят кодексининг 168-моддаси (фирибгарлик) 3-қисми ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ бош прокурор Ниғматилла Йўлдошев Ўзбекистонда икки йил ичида салкам 2000 нафар мансабдор шахс коррупциявий жиноятлари учун жиноий жавобгарликка тортилганини маълум қилганди.
Изоҳ (0)