Жамшид Қўчқоров: 9 ойда давлат дастурининг жами 105 та банди тўлиқ бажарилган, 6 та банд бўйича топшириқлар ижроси муддатидан кечиккан

Сенатнинг тўққизинчи ялпи мажлиси ўз ишини кун тартибидан ўрин олган еттинчи масалани кўриб чиқишдан бошлади. Унда Вазирлар Маҳкамасининг 2020 йилнинг тўққиз ойи давомида Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид давлат дастури бажарилишининг бориши тўғрисидаги ҳисоботи тингланди. Ҳисоботни Иқтисодий тараққиёт ва камбағалликни қисқартириш вазири Жамшид Қўчқоров ўқиб эшиттирди.

Қўчқоровнинг айтишича, 2020 йилнинг 9 ойи давомида давлат дастурининг 173 та, жумладан, учинчи чоракда 5 та устувор йўналиш бўйича жами 55 та банд ва йил давомида 64 та банднинг бажарилиши белгиланган. Ҳисобот даврида давлат дастурининг жами 105 та банди тўлиқ бажарилиб, 119 та норматив-ҳуқуқий ва бошқа ҳужжатлар, шу жумладан, 2 та Ўзбекистон Республикасининг қонуни, 5 та Олий Мажлис палаталари қарори ва 43 та Ўзбекистон Республикаси ва 24 та Вазирлар Маҳкамаси қарори қабул қилинган.

163 та норматив-ҳуқуқий ҳужжат ҳамда 121 та чора-тадбирлар дастури ва бошқа ҳужжатлар лойиҳаларини ишлаб чиқиш назарда тутилган Давлат дастури ижросини таъминлаш ва доимий мониторинг қилиб бориш юзасидан Ҳукуматда яхлит тизим яратилган. Давлат дастуридаги 4 та банд муддатидан аввал бажарилган. Бундан ташқари 49 та банд ижроси бўйича тегишли ҳужжатлар лойиҳаларини тайёрлаш ва келишиш юзасидан ишлар якунланиб, улар Президент администрацияси ва Олий Мажлис палаталарида ишланаётганлиги билдирилди.

16 та банд бўйича топшириқларни сифатли ва пухта ишлаб чиқиш, дунё бўйича пандемия сабабли юзага келган иқтисодий инқироз шароитида давлат бюджети харажатларини оптималлаштириш учун давлат раҳбарига ахборот берилиб, рухсат олинганидан сўнг ижро муддати узайтирилган.

Давлат дастурининг 6 та банди бўйича топшириқлар ижроси муддатидан кечиккан эди. Шундан дастурнинг олий таълим муассасаларини трансформация қилиш бўйича 166-банди юзасидан 2020 йилнинг 27 октябридаги Вазирлар Маҳкамаси қарори Бош вазир томонидан имзоланган. Шунингдек, давлат дастурининг  тадбиркорлар томонидан амалга оширилган инфратузилма яратиш харажатларини қисман давлат томонидан қоплаш тизимини жорий этиш бўйича 78-банди юзасидан Президент администрациясига ахборот берилиб, ижро муддати узайтирилган. Қолган ижроси кечикаётган 4 та банд бўйича президентга ахборот бериш учун тегишли материаллар тайёрланган.

Жамшид Қўчқоров, Иқтисодий тараққиёт ва камбағалликни қисқартириш вазири

Шу билан бирга, Вазирлар Маҳкамасида ҳукумат ҳисоботини эшитиш амалиёти доирасида сенаторларнинг таклифлари асосида ҳукуматнинг Олий Мажлисдаги ваколатли вакили билан бирга парламент ва сенаторлар билан ишлаш бўйича ҳам алоҳида тизим йўлга қўйилгани таъкидланди. 2020 йилнинг 9 ойида сенатдан келиб тушган 9 та парламент сўровининг барчасига жавоблар муддатида киритилган. Ҳисобот даврида 52 та сенатор сўровларининг бажарилиши таъминланган. Сенат томонидан Вазирлар Маҳкамасига келиб тушган 408 та сўровнинг 241 таси тўлиқ бажарилган, қолганлари устида ҳам ишланаётгани айтилди.

Дастурнинг 2020 йилнинг тўртинчи чорагига тўғри келадиган 47 та банди борлиги ҳамда улар бўйича чоралар кўрилиши қўшимча қилинди.