Senatning to‘qqizinchi yalpi majlisi o‘z ishini kun tartibidan o‘rin olgan yettinchi masalani ko‘rib chiqishdan boshladi. Unda Vazirlar Mahkamasining 2020-yilning to‘qqiz oyi davomida Harakatlar strategiyasini “Ilm, ma’rifat va raqamli iqtisodiyotni rivojlantirish yili”da amalga oshirishga oid davlat dasturi bajarilishining borishi to‘g‘risidagi hisoboti tinglandi. Hisobotni Iqtisodiy taraqqiyot va kambag‘allikni qisqartirish vaziri Jamshid Qo‘chqorov o‘qib eshittirdi.

Qo‘chqorovning aytishicha, 2020-yilning 9 oyi davomida davlat dasturining 173 ta, jumladan, uchinchi chorakda 5 ta ustuvor yo‘nalish bo‘yicha jami 55 ta band va yil davomida 64 ta bandning bajarilishi belgilangan. Hisobot davrida davlat dasturining jami 105 ta bandi to‘liq bajarilib, 119 ta normativ-huquqiy va boshqa hujjatlar, shu jumladan, 2 ta O‘zbekiston Respublikasining qonuni, 5 ta Oliy Majlis palatalari qarori va 43 ta O‘zbekiston Respublikasi va 24 ta Vazirlar Mahkamasi qarori qabul qilingan.

163 ta normativ-huquqiy hujjat hamda 121 ta chora-tadbirlar dasturi va boshqa hujjatlar loyihalarini ishlab chiqish nazarda tutilgan Davlat dasturi ijrosini ta’minlash va doimiy monitoring qilib borish yuzasidan Hukumatda yaxlit tizim yaratilgan. Davlat dasturidagi 4 ta band muddatidan avval bajarilgan. Bundan tashqari 49 ta band ijrosi bo‘yicha tegishli hujjatlar loyihalarini tayyorlash va kelishish yuzasidan ishlar yakunlanib, ular Prezident administratsiyasi va Oliy Majlis palatalarida ishlanayotganligi bildirildi.

16 ta band bo‘yicha topshiriqlarni sifatli va puxta ishlab chiqish, dunyo bo‘yicha pandemiya sababli yuzaga kelgan iqtisodiy inqiroz sharoitida davlat budjeti xarajatlarini optimallashtirish uchun davlat rahbariga axborot berilib, ruxsat olinganidan so‘ng ijro muddati uzaytirilgan.

Davlat dasturining 6 ta bandi bo‘yicha topshiriqlar ijrosi muddatidan kechikkan edi. Shundan dasturning oliy ta’lim muassasalarini transformatsiya qilish bo‘yicha 166-bandi yuzasidan 2020-yilning 27-oktabridagi Vazirlar Mahkamasi qarori Bosh vazir tomonidan imzolangan. Shuningdek, davlat dasturining  tadbirkorlar tomonidan amalga oshirilgan infratuzilma yaratish xarajatlarini qisman davlat tomonidan qoplash tizimini joriy etish bo‘yicha 78-bandi yuzasidan Prezident administratsiyasiga axborot berilib, ijro muddati uzaytirilgan. Qolgan ijrosi kechikayotgan 4 ta band bo‘yicha prezidentga axborot berish uchun tegishli materiallar tayyorlangan.

Jamshid Qo‘chqorov, Iqtisodiy taraqqiyot va kambag‘allikni qisqartirish vaziri

Shu bilan birga, Vazirlar Mahkamasida hukumat hisobotini eshitish amaliyoti doirasida senatorlarning takliflari asosida hukumatning Oliy Majlisdagi vakolatli vakili bilan birga parlament va senatorlar bilan ishlash bo‘yicha ham alohida tizim yo‘lga qo‘yilgani ta’kidlandi. 2020-yilning 9 oyida senatdan kelib tushgan 9 ta parlament so‘rovining barchasiga javoblar muddatida kiritilgan. Hisobot davrida 52 ta senator so‘rovlarining bajarilishi ta’minlangan. Senat tomonidan Vazirlar Mahkamasiga kelib tushgan 408 ta so‘rovning 241 tasi to‘liq bajarilgan, qolganlari ustida ham ishlanayotgani aytildi.

Dasturning 2020-yilning to‘rtinchi choragiga to‘g‘ri keladigan 47 ta bandi borligi hamda ular bo‘yicha choralar ko‘rilishi qo‘shimcha qilindi.