Air Cairo компанияси илк бор Шарм-ал-Шайх ва Тошкент ўртасида 25 ноябрдан бошлаб мунтазам рейслар йўлга қўйилаётганини маълум қилди. Бу ҳақда Миср фуқаролик авиацияси вазирлиги хабар берган.
2021 йил апрель ойидан бошлаб компания декабрда йўлга қўйиладиган Шарм-ал-Шайх ҳамда Самарқанд ўртасидаги чартер рейсларга қўшимча равишда ҳафтасига 4 та рейсни қўшмоқчи.
2019 йил августда Ўзбекистон бозорида Мисрнинг янги лоукостери пайдо бўлиши муносабати билан Шарм-ал-Шайх билан авиапарвозлар сони ошиши ҳақида хабар қилинганди. Nile Air авиакомпанияси бунда Шарм-ал-Шайх — Тошкент — Шарм-ал-Шайх йўналишини амалга оширишда Ўзбекистон Монополияга қарши кураш қўмитасидан кўмак сўраган.
Air Cairo — Мисрнинг чартер авиакомпанияси бўлиб, унинг штаб-квартираси Қоҳирада жойлашган, компания Европа, Африка ва Осиёдан Мисрга саёҳатларни ташкиллаштирадиган туроператорларга хизмат кўрсатади. Компанияни бошқариш ҳуқуқи мамлакатнинг EgyptAir флагманига тегишли.
2020 йил 28 октябрь куни Олий Мажлис Қонунчилик палатасида давлат дастурининг 3-чоракда бажарилиши юзасидан ҳукумат ҳисоботи эшитилган, унда бош вазир ўринбосари, Туризмни ривожлантириш давлат қўмитаси раиси Азиз Абдуҳакимов мамлакатда туризмни тиклаш режаларига тўхталиб ўтган, хусусан, Ўзбекистонга лоукостерларни жалб қилиш чоралари кўрилаётганини билдирган.
2020 йил 4 ноябрдан бошлаб Бирлашган Араб Амирликлари ҳамда Ўзбекистон Транспорт вазирлиги ўртасидаги ҳаво қатнови бўйича келишувига мувофиқ БААнинг Air Arabia авиакомпанияси Шаржа—Тошкент—Шаржа йўналишларида мунтазам авиақатновларни йўлга қўйилган. Кейинчалик Uzbekistan Airways 2020 йил 1 декабрдан бошлаб Дубайга қатновлар ҳафтасига 5 маротаба – душанба, чоршанба, пайшанба, жума ва якшанба кунлари амалга оширилишини маълум қилган.
2020 йилги Давлат дастурига бешта янги авиакомпания ташкил этиш ҳам киритилган эди. Умуман, мамлакатда авиакомпаниялар сони кўпайиши ҳақида 2018 йилда бош вазир биринчи ўринбосари Очилбой Раматов, 2020 йилда бош вазир ўринбосари Азиз Абдуҳакимов, транспорт вазири Элёр Ғаниев ҳам гапирган. Бироқ амалда «Ўзбекистон ҳаво йўллари»ни Uzbekistan Airways, Uzbekistan Airports ва Uzbekistan Helicopters’га бўлишдан бошқа иш бўлмади.
Изоҳ (0)