Мирзо Улуғбек номидаги Ўзбекистон Миллий университетида Гидрометеорология факультети ташкил этилади, деб хабар бермоқда Олий ва ўрта махсус таълим вазирлиги матбуот хизмати.
Қайд этилишича, бу ҳақда «Ўзбекистон Республикаси гидрометеорология хизмати фаолиятини янада такомиллаштириш чора-тадбирлари тўғрисида»ги Президент қарорида белгиланди.
Қарорга мувофиқ, университетда янги факультет 2021/2022-ўқув йилидан бошлаб ташкил этилади.
Шунингдек, қарорда 2021/2022-ўқув йилидан бошлаб Россия давлат гидрометеорология университети ва бошқа хорижий таълим муассасалари билан ҳамкорликда қўшма таълим дастурлари бўйича гидрометеорология йўналишида кадрлар тайёрлашни ташкил этиш белгиланган.
Тошкент гидрометеорология коллежи негизида Тошкент гидрометеорология техникуми ташкил этилади ва бу ерда гидрометеорология соҳасида ўрта бўғин мутахассислари тайёрланади.
Техникумда кадрлар тайёрлаш давлат буюртмаси ва тўлов-шартнома асосида амалга оширилади.
Эслатиб ўтамиз, ноябрь ойининг бошларида Ўзбекистон Гидрометеорология хизмати самарали фаолият юритиш учун ходимларнинг ойлик маошлари камлиги ва малакали кадрлар кетиб қолиши каби масалаларни зудлик билан ҳал этиш лозимлигини маълум қилганди. Шу куни Президент Шавкат Мирзиёев мамлакатда гидрометеорология хизмати фаолиятини такомиллаштириш бўйича устувор вазифалар муҳокамаси юзасидан йиғилиш ўтказганди.
Изоҳ (0)