Ўзбекистон 18 ноябрь куни Қирғизистонга навбатдаги гуманитар ёрдамни — 200 койка-ўринга мўлжалланган ихтисослаштирилган шифохона контейнерларини юборди. Бу ҳақда «Ўзбекистон темир йўллари» матбуот хизмати хабар берди.
Контейнерлардан юқумли касалликлар шифохонасини қуришда фойдаланилади. Таъкидланишича, яқин вақтлар ичида Қирғизистонга шу каби конструкцияларнинг яна бир партиясини жўнатиш режалаштирилмоқда.
Аввалроқ Ўзбекистон Қирғизистонга тиббиёт воситалари ва 3 минг тонна буғдой юборгани тўғрисида хабар берилганди. «Ўзбекистон темир йўллари» бошқаруви раиси вазифасини бажарувчи Хусниддин Хасиловнинг маълум қилишича, шунингдек, Қирғизистонга коронавирусга қарши курашда ёрдам кўрсатиш учун ўзбекистонлик шифокорларни ҳам юбориш режалаштирилмоқда.
Эслатиб ўтамиз, 14 ноябрь куни Шавкат Мирзиёев телефон орқали Садир Жапаров билан стратегик шериклик муносабатларини муҳокама қилганди. Шу билан бирга, Шавкат Мирзиёев Ўзбекистон Қирғизистоннинг барқарор ривожланиш йўлидаги интилишини ҳар томонлама қўллаб-қувватлашини таъкидлаб ўтганди.
Маълумот учун, Ўзбекистон Қирғизистонга 2020 йилнинг апрель, май, июль ойларида ҳам инсонпарварлик ёрдами жўнатган. Шунингдек, Фарғона вилояти Қирғизистоннинг Боткен вилоятига инсонпарварлик ёрдами юборганди. Август ойида эса Ўзбекистон Қирғизистонга 560 минг долларлик инсонпарварлик ёрдами жўнатганди.
Изоҳ (0)