SamAuto заводи 2022 йилгача электробуслар ишлаб чиқаришни ўзлаштиради

SamAuto компанияси 19 ноябрь куни «Тошшаҳартрансхизмат» АЖга 51-йўналиш (Юнусобод 6-мавзе—Бешёғоч майдони) бўйича ҳаракатланадиган синов электробусини тақдим этди. Бу ҳақда автозавод вакилларига таяниб, «Gazeta.uz» хабар берди.

Маълум қилинишича, эксплуатация жараёнида SamAuto мутахассислари ўз электробусини ишлаб чиқиш учун йўловчилар ва ҳайдовчиларнинг фикрларини ҳисобга олади, шунингдек, мазкур моделнинг сифати ва функционал вазифалари ўрганилади ва уларнинг мониторинги олиб борилади.

SamAuto бош директори ўринбосари, маркетинг ва сотувлар бўлими раҳбари Илҳом Ярашевнинг билдиришича, ушбу электробус электротранспорт ишлаб чиқариш бўйича жаҳон етакчиларидан бири бўлган Хитойнинг BYD компанияси томонидан ишлаб чиқарилган. Бир марталик қувватлантириш ҳисобига 300 километр масофани босиб ўтади, бу шаҳар автобусининг ўртача бир кунда босиб ўтадиган масофасига тўғри келади. Тўлиқ қувватлантиришни электр тармоғига юклама камроқ бўлган пайтда 3-4 соат ичида бажариш мумкин. Электробуслар хизмат кўрсатиш жиҳатидан содда, шовқинсиз ҳамда газ ва дизель транспортига қараганда кам харажат талаб қилади.

Электробуснинг узунлиги 12 метрни, йўловчиларни ташиш ҳажми 76 кишини ташкил қилади. «Унинг пол қисми паст бўлади: зинапоялар ва подиумнинг йўқлиги туфайли йўловчилар, шу жумладан, пенсионерлар, аравачаларда ҳаракатланувчи йўловчилар, алоҳида эҳтиёжли кишилар салон бўйлаб эркин ҳаракатлана олади. Шунингдек, электробус видеокузатув камераси ва автоматик ҳаво намлигини сақлаш ва иситиш тизими билан жиҳозланган», — дейилади компания хабарида.

Атроф-муҳитни муҳофаза қилиш бўйича 2030 йилгача мўлжалланган концепциясига мувофиқ, Ўзбекистон жамоат транспортининг камида 50 фоизи зарарли моддаларни ҳавога чиқаришни камайтириш учун муқобил ёқилғи турларига ўтиши керак.

Эслатиб ўтамиз, Тошкент шаҳар ҳокими Жаҳонгир Ортиқхўжаев ва «Белкоммунмаш» раҳбари Владимир Корол ўртасида 2018 йил сентябрида бўлиб ўтган музокаралар якунига кўра, Беларусь электробусларидан бирини Тошкентда синаб кўриш бўйича келишувга эришилган эди. 450 минг долларга харид қилинган биринчи электробус Тошкентда 2019 йилнинг 13 сентябридан ҳаракатланишни бошлаганди. 2020 йилнинг март ойидан бошлаб эса Тошкентнинг 52-автобус йўналиши (Бешёғоч—Юнусобод) бўйлаб Хитойнинг Yutong электробуси синов тариқасида қатнай бошлаганди.

Аввалроқ Тошкентга уч йил ичида 300 та янги электробус олиб келиниши мумкинлиги ҳақида хабар берилганди.