Фото: Деҳқонободдаги ўрта асрларни эслатувчи мактаб филиали 40 кунда қайта таъмирланди

Қашқадарё вилоятининг Деҳқонобод туманида ўрта асрларни эслатувчи мактаб филиали борлиги маълум бўлди. Бу ҳақда «Дарё»га хабар берган туман ҳокимлиги ахборот хизматининг ёзишича, мазкур мактаб тумандаги 79-мактабнинг 1988 йилда ҳашар йўли билан қурилган филиали ҳисобланади.

Таъкидланишича, мазкур филиалда Консой қишлоғида яшовчи 35 нафар ўқувчи таҳсил олади.

«Деҳқонобод ҳокими Зоир Алиқулов ва прокурор Лазиз Ҳамраев бундан 40 кун илгари туманнинг Консой қишлоғидаги 79-мактаб филиалида бўлиб, ўрта асрларни эслатувчи филиал биносида таҳсил олаётган ўқувчилар билан мулоқот қилганди. Ҳоким 35 нафар ўқувчи таҳсил олувчи филиал биноси айни кунга келиб фойдаланишга яроқсиз бўлиб қолганини инобатга олиб, бинони янгилашга қарор қилганди. Ўтган 40 кун ичида мактаб маҳаллий бюджет маблағлари ҳисобига қайта таъмирланди», — дейилади ҳокимлик ахборот хизмати берган маълумотда.

Айтилишича, мазкур мактаб филиали туман марказидан 21 километр узоқликдаги 35-40 та хўжалик истиқомат қилувчи қишлоқчада жойлашган.

Ҳокимлик ахборот хизматининг аниқлик киритишича, туманда 2016 йилдаги ҳисоб-китобга кўра 17 та шундай филиал бўлган. Айни кунга келиб, шундай мактабларнинг 11 таси таъмирланиб, замонавий кўринишга келган.

«Қолган 6 та филиал ҳам режага киритилган бўлиб, тез орада таъмирланиб, муаммолар бартараф этилади», — дейди туман ҳокими Зоир Алиқулов.

«Анча йиллардан бери таъмирталаб аҳволга келган мактаб биноси ҳоким Зоир Алиқулов ва прокурор Лазиз Ҳамраев ташаббуси билан янгиланди. Бу нафақат фарзандларимизни, биз ота-оналарни ҳам қувонтирди», — дейди ушбу мактабда 25 йил фаррош бўлиб ишлаган Анна момо Эргашева.

Филиал биноси очилишида иштирок этган ҳоким ва прокурор ўқувчиларга 50 дона бадиий китоб совға қилган. Тадбирда ўқувчи ва ўқитувчилар билан мулоқотга киришган ҳоким эса китобга меҳр қўйиш лозимлигини таъкидлаб, ўқувчиларга дарсдан ташқари вақтларида китоб мутолааси билан машғул бўлишни тавсия қилган.

Эслатиб ўтамиз, аввалроқ Чироқчи туманидаги 61-мактаб филиалининг қўрқинчли синфхоналари ижтимоий тармоқларда кўплаб муҳокамаларга сабаб бўлганди. Мазкур ҳақиқат оммага ошкор бўлгач, дастлаб вилоят халқ таълими бошқармаси, сўнгра Чироқчи туман ҳокимлиги мазкур ҳақиқатни айтганларни ёлғончиликда айблади. Омма эътибори қаратилган синфхоналарга ўтин киритиб «бу ерда дарс ўтилмайди» дея ёлғон гапирган директор кейинчалик ҳақиқатни тан олгач, вилоят ҳокими уни лавозимига нолойиқ деб атаганди.

Президент Шавкат Мирзиёевнинг 2020 йил 12—13 ноябрь кунлари вилоятга қилган ташрифи чоғида ҳудудда бундай филиал мактаблар борлиги тан олиниб, уларни таъмирлаш ва янгилаш учун республика бюджетидан 250 миллиард сўм маблағ берилиши маълум қилинганди.