Foto: Dehqonoboddagi o‘rta asrlarni eslatuvchi maktab filiali 40 kunda qayta ta’mirlandi

Qashqadaryo viloyatining Dehqonobod tumanida o‘rta asrlarni eslatuvchi maktab filiali borligi ma’lum bo‘ldi. Bu haqda “Daryo”ga xabar bergan tuman hokimligi axborot xizmatining yozishicha, mazkur maktab tumandagi 79-maktabning 1988-yilda hashar yo‘li bilan qurilgan filiali hisoblanadi.

Ta’kidlanishicha, mazkur filialda Konsoy qishlog‘ida yashovchi 35 nafar o‘quvchi tahsil oladi.

“Dehqonobod hokimi Zoir Aliqulov va prokuror Laziz Hamrayev bundan 40 kun ilgari tumanning Konsoy qishlog‘idagi 79-maktab filialida bo‘lib, o‘rta asrlarni eslatuvchi filial binosida tahsil olayotgan o‘quvchilar bilan muloqot qilgandi. Hokim 35 nafar o‘quvchi tahsil oluvchi filial binosi ayni kunga kelib foydalanishga yaroqsiz bo‘lib qolganini inobatga olib, binoni yangilashga qaror qilgandi. O‘tgan 40 kun ichida maktab mahalliy budjet mablag‘lari hisobiga qayta ta’mirlandi”, — deyiladi hokimlik axborot xizmati bergan ma’lumotda.

Aytilishicha, mazkur maktab filiali tuman markazidan 21 kilometr uzoqlikdagi 35-40 ta xo‘jalik istiqomat qiluvchi qishloqchada joylashgan.

Hokimlik axborot xizmatining aniqlik kiritishicha, tumanda 2016-yildagi hisob-kitobga ko‘ra 17 ta shunday filial bo‘lgan. Ayni kunga kelib, shunday maktablarning 11 tasi ta’mirlanib, zamonaviy ko‘rinishga kelgan.

“Qolgan 6 ta filial ham rejaga kiritilgan bo‘lib, tez orada ta’mirlanib, muammolar bartaraf etiladi”, — deydi tuman hokimi Zoir Aliqulov.

“Ancha yillardan beri ta’mirtalab ahvolga kelgan maktab binosi hokim Zoir Aliqulov va prokuror Laziz Hamrayev tashabbusi bilan yangilandi. Bu nafaqat farzandlarimizni, biz ota-onalarni ham quvontirdi”, — deydi ushbu maktabda 25 yil farrosh bo‘lib ishlagan Anna momo Ergasheva.

Filial binosi ochilishida ishtirok etgan hokim va prokuror o‘quvchilarga 50 dona badiiy kitob sovg‘a qilgan. Tadbirda o‘quvchi va o‘qituvchilar bilan muloqotga kirishgan hokim esa kitobga mehr qo‘yish lozimligini ta’kidlab, o‘quvchilarga darsdan tashqari vaqtlarida kitob mutolaasi bilan mashg‘ul bo‘lishni tavsiya qilgan.

Eslatib o‘tamiz, avvalroq Chiroqchi tumanidagi 61-maktab filialining qo‘rqinchli sinfxonalari ijtimoiy tarmoqlarda ko‘plab muhokamalarga sabab bo‘lgandi. Mazkur haqiqat ommaga oshkor bo‘lgach, dastlab viloyat xalq ta’limi boshqarmasi, so‘ngra Chiroqchi tuman hokimligi mazkur haqiqatni aytganlarni yolg‘onchilikda aybladi. Omma e’tibori qaratilgan sinfxonalarga o‘tin kiritib “bu yerda dars o‘tilmaydi” deya yolg‘on gapirgan direktor keyinchalik haqiqatni tan olgach, viloyat hokimi uni lavozimiga noloyiq deb atagandi.

Prezident Shavkat Mirziyoyevning 2020-yil 12—13-noyabr kunlari viloyatga qilgan tashrifi chog‘ida hududda bunday filial maktablar borligi tan olinib, ularni ta’mirlash va yangilash uchun respublika budjetidan 250 milliard so‘m mablag‘ berilishi ma’lum qilingandi.