Навоий вилояти Учқудуқ тумани Экология инспекцияси давлат инспекторлари томонидан ўтказилган тунги рейд тадбирида Учқудуқ туман «Алтинтау» ОФЙ Турбай ҳудудидан Учқудуқ туман фуқароси Ж.Рю ўз бошқарувидаги мотоцикл ёрдамида «Қизил китоб»га киритилган кийикни овлаб, ўлжани олиб келаётган вақтида тўхтатилган. Бу ҳақда Навоий вилояти Экология бошқармаси ахборот хизматига асосланиб, ЎзА хабар қилди.
Ушбу ҳолат юзасидан фуқарога нисбатан 33 миллион 450 минг сўм табиатга етказилган зарар ҳисобланиб, Маъмурий жавобгарлик тўғрисидаги кодекснинг 94-модданинг 1-қисми (ноёб ёки йўқ бўлиб кетиш хавфида турган ҳайвонларни йўқ қилиб юбориш, ўлжа қилиш ёхуд шундай ҳайвонларнинг қирилиб кетишига, соғи камайиб кетишига ёки яшаш муҳити бузилишига сабаб бўлиши мумкин бўлган бошқа ҳаракатлар содир этиш) билан маъмурий ҳужжатлар расмийлаштирилди ва туман маъмурий судига ўтказиш учун тайёрланмоқда.
Аввал ноқонуний ов қилгани учун ушланган Тупроққалъа тумани ҳокими ўринбосари ўз аризасига кўра ишдан бўшатилгани, Бухоро вилояти Жондор туманидаги «Қумсултон» табиий сув ҳавзасида ноқонуний тарзда ўрдак овлаган шахслар жаримага тортилгани, Бухоро туманидаги «Жайрон питомниги» ҳудудида қўлбола ёритиш чироғи ёрдамида яширин равишда ов қилган 26 ёшли фуқаро Р.Б. ҳамда 65 ёшли Ж.С. қўлга олингани ҳақида хабарлар берилган.
Изоҳ (0)