Ўзбекистонда пандемия даврида COVID-19’ни аниқлаш бўйича тестлар нархи икки бараварга ошгани маълум бўлди

Ўзбекистон Президенти Администрацияси ҳузуридаги Иқтисодий тадқиқотлар ва ислоҳотлар маркази пандемия пайтида энг муаммоли масалаларни аниқлаш учун 2020 йилнинг май—июнь ойларида 3670 нафар респондент ўртасида сўров ўтказди. Бу ҳақда Spot хабар берди.

Маълум қилинган натижаларга кўра, пандемия пайтида, биринчи навбатда, респондентлар даромадларнинг камайиши ва йўқолиши муаммосига дуч келган. Бу муаммолардан мос равишда 74 фоиз ва 58 фоиз сўров иштирокчиси шикоят қилган. Бундан ташқари, бу муаммога учраганларнинг аксарияти Тошкент шаҳрида (80 фоиз) яшайди. Жиззах, Сирдарё ва Қашқадарё вилоятлари ҳам бу масалада муаммоли бўлиб чиқди. Хоразм ва Навоий вилоятларидаги вазият энг қулай бўлган.

Шунингдек, сўров иштирокчилари қуйидагилар муаммоларга ҳам дуч келган:

• маиший хизматларни олиш (36 фоиз);
• мактабгача таълимни олиш (32 фоиз);
• мактаб таълимини олиш (31 фоиз);
• озиқ-овқат нархларининг ўсиши (23 фоиз);
• коммунал тўловлар бўйича қарзлар (15 фоиз);
• стресс ва хавотир (9 фоиз);
• ноозиқ-овқат маҳсулотлари нархларининг ўсиши (7 фоиз);
• энг яқин дўконда озиқ-овқат етишмаслиги (6 фоиз).

Мутахассисларнинг таъкидлашича, дори-дармонларга талаб юқори бўлганлиги сабабли хусусий дорихоналар вирусга қарши дори-дармонларнинг нархларини оширган, тест ўтказиш нархларини хусусий клиникалар деярли икки баравар — 250 минг сўмдан 400 минг сўмгача оширган.

Респондентларнинг деярли 44 фоизи меҳнат муҳожирларининг қайтиб келишини пайқаган, уларнинг 64,2 фоизи уй-рўзғор буюмлари нархларининг ўсишини кузатмаган ва 33,2 фоизи май ойида озиқ-овқат маҳсулотлари нархининг бироз кўтарилишига дуч келган.

Респондентларнинг тўртдан биридан кўпроғи (25,4 фоиз) ўзларининг фаровонлиги ёмонлашаётганидан шикоят қилган.

Бироқ қайд этилган барча муаммоларга қарамай, сўров қатнашчиларининг тўртдан учдан кўпроғи (75,8 фоиз) вазият тез орада яхшиланишига ишонч билдирган.

«Ушбу тадқиқот асосида биз аҳоли зичлиги юқори бўлган ҳудудларга (Тошкент шаҳри, Тошкент ва Самарқанд вилоятлари) пандемия оқибатлари кўпроқ салбий таъсир кўрсатиши мумкин, деб ўйлаймиз», — дея таъкидлаган мутахассислар.