Ички ишлар вазирлиги Йўл ҳаракати хавфсизлиги бош бошқармасининг маълум қилишича, 18—19 ноябрь кунлари А-373 Тошкент—Ўш автомобиль йўлининг Қамчиқ довони қисмида вақти-вақти билан кучли қор ёғиши кутилмоқда. Шу сабабли ЙҲХББ довон орқали автомобилда ҳаракатланувчиларни огоҳликка чақирди.
Шунингдек, довонда туман тушиб, кўриш даражаси 50 метргача пасайиши, шамол тезлиги секундига 17-22 метргача кучайиши, йўлда қор уюмлари, музлама ҳосил бўлиши кутилмоқда. 18 ноябрдан ҳаво ҳарорати пасаяди, 19—20 ноябрга келиб ҳарорат кечаси 15-18 даражагача, кундузи 9-12 даражагача пасаяди.
Аввалроқ Ўзбекистонга 18—20 ноябрда Ғарбий Қозоғистон орқали Урал ҳудудлари устида шаклланган совуқ ва нам ҳаво массалари кириб келиши сабабли ҳафта ўртасида ҳаво кескин совиши кутилаётгани ҳақида хабар берилганди.